Umunya-Argentine Marco Trungelliti yegukanye Irushanwa rya Tennis rizwi nka Rwanda Challenger 2026, atsinze Umutaliyani Marco Cecchinato amaseti 2-1 [4–6, 6–0, 6–3], mu mukino warebwe na Perezida Kagame na Madamu Jeannette Kagame.
Uyu mukino wabereye muri IPRC Kigali Ecology Tennis Club, kuri iki Cyumweru, tariki ya 15 Werurwe 2026.
Rwanda Challenger izwi nka ATP Challenger iri mu marushanwa atatu agize African Tennis Tour. Andi abera i Abidjan muri Côte d’Ivoire n’i Brazzaville muri Repubulika ya Congo, na yo yatangijwe nyuma y’abera mu Mujyi wa Kigali.
Marco Trungelliti wegukanye iri rushanwa, yageze ku mukino wa nyuma atsinze Zdenek Kolar mu gihe Marco Cecchinato we yasezereye Arthur Gea.
Rwanda Challenger igizwe n’amarushanwa mpuzamahanga rya Tennis y’ababigize umwuga, yaberaga i Kigali kuva ku wa 2 Werurwe 2026, aho yakinwe mu byumweru bibiri.
“ATP Challenger 75” yabaye mu cyumweru cya mbere na “ATP Challenger 100” yakinwe mu cya kabiri, ni amarushanwa atanu ategurwa n’Ishyirahamwe rya Tennis y’Ababigize umwuga (ATP), aho atanga amanota 75 na 100.
Aya marushanwa yombi yitabiriwe n’abakinnyi 66 bo mu bihugu 20 bitandukanye.
Umunya-Argentine Marco Trungelliti yanditse amateka yo kwegukana ATP Challenger ku nshuro ya kabiri kuko yanegukanye iya 2024, ubwo iri rushanwa ryatangiraga gukinirwa mu Rwanda, icyo gihe yari ATP Challenger 50, itanga amanota 50.
Trungelliti uri ku mwanya wa 132 ku Isi ni we mukinnyi wari uhagaze neza kurusha abandi aho yari akurikiwe na Arthur Gea uri ku mwanya wa 161 na Luka Mikrut wa 165.
“ATP Challenger 75” yabaye mu cyumweru cya mbere na “ATP Challenger 100” yabaga mu cyumweru cya kabiri, ni amwe mu marushanwa atanu ategurwa n’Ishyirahamwe rya Tennis y’Ababigize umwuga (ATP) muri iki cyiciro (hagati ya 50-175), aho atanga amanota 75 na 100 uko akurikirana.
Ni ku nshuro ya kabiri yikurikiranya u Rwanda rwakiriye ATP Challenger 75 na 100 nyuma yo kubikora mu 2025.
Icyumweru cya Mbere cya “Rwanda Challenger 2026” cyatanze amanota 75 n’ibihumbi 17$, cyegukanywe n’Umunya-Autriche Joel Schwaerzler w’imyaka 20, atsinze Umutaliyani Stefano Napolitano amaseti 2-0 (7-6(5), 7-6(6)).
