U Rwanda n’igihugu cya Antigua na Barbuda byasinyanye amasezerano arimo gukuriraho visa abaturage b’impande zombi, n’andi y’ubufatanye mu rwego rw’ubuzima n’ay’ubufatanye mu rwego rw’ubukerarugendo.
Aya masezerano yasinyiwe i New York, muri Leta Zunze Ubumwe za Amerika yashyizweho umukono ku ruhande rw’u Rwanda na Ambasaderi w’u Rwanda muri Loni Martin Ngoga n’uw’igihugu cya Antigua na Barbuda, Amb. Walton Webson.
Aya masezerano yasinyiwe arimo gukuriraho viza abaturage b’impande zombi, andi y’ubufatanye mu rwego rw’ubuzima n’ay’ubufatanye mu rwego rw’ubukerarugendo, akazafasha guteza imbere umubano hagati y’u Rwanda na Antigua na Barbuda mu by’ubukungu, imibereho myiza n’imibanire ya dipolomasi.
Amasezerano yo gukuraho Viza azafasha Abanyarwanda kujya muri iki gihugu giherereye mu birwa bya Carribian batatswe Viza, ndetse n’abaturage baAntigua na Barbuda baze mu Rwanda batatswe Viza. Ibi bizorohereza urujya n’uruza, binateze imbere ubusabane mu muco n’ubufatanye hagati y’ibihugu byombi.
Amb Martin Ngoga yagaragaje ko u Rwanda rwiteguye gukomeza gushimangira ubufatanye n’igihugu cya Antigua na Barbuda, haba mu rwego mpuzamahanga mu miryango nka Loni ndetse n’ubufatanye hagati y’ibihugu byombi.
Mu rwego rw’ubuzima, ibihugu byombi byemeranyije ku bufatanye mu kurwanya indwara zandura nka Sida na Malariya, ubufatanye mu by’imiti, gukurikirana indwara mu buryo bw’imibare (épidémiologie), n’imikurire y’abana n’ababyeyi.
Mu rwego rw’ubukerarugendo, amasezerano agena ubufatanye mu kwamamaza ubukerarugendo hagati y’ibihugu byombi, guteza imbere ubukerarugendo burengera ibidukikije, gukoresha ingufu zitangiza ikirere no gushyiraho politiki zihamye z’ubukerarugendo burambye.
Amb. Walton Webson wa Antigua na Barbuda yashimye aya masezerano, avuga ko ari intambwe ikomeye mu kubaka umubano mwiza hagati ya Afurika na Carribian.
