Urwego rw’Igihugu rw’Iterambere (RDB), ku bufatanye na Ambasade y’u Rwanda muri Singapore n’Ikigo cya Singapore cya Mandai Wildlife Group, batangije ku mugaragaro agace gashya kitwa “Rwanda Nyungwe Forest – Heart of Africa”.
Aka gace kitiriwe u Rwanda gaherereye muri pariki y’inyoni ya Bird Paradise, iri muri pariki ya Singapore ya Mandai Wildlife Reserve, ibarizwamo pariki enye zirimo Singapore Zoo, River Wonders, Night Safari n’iheruka gufungurwa ya Rainforest Wild Asia.
Rwanda Nyungwe Forest – Heart of Africa” ifite ubuso bwa hegitari 1.55, ikaba ariyo nini muri Bird Paradise. Hahanzwe hagamijwe kugaragaza uburanga bwa Pariki y’Igihugu ya Nyungwe no gusangiza Isi ubutunzi kamere u Rwanda rufite, by’umwihariko mu rwego rw’ubukerarugendo burengera ibidukikije.
Aka gace kazajya kagaragaza ishusho y’imisozi n’amashyamba ya Nyungwe, karimo inyoni zisaga 800, harimo amoko atandukanye aboneka muri Afurika nk’inuma, inkongoro n’izindi.
Hashyizwemo kandi na Canopy Walkway, inzira yo mu kirere izajya ituma abashyitsi bareba inyoni n’ibindi binyabuzima bitandukanye biri muri iryo shyamba.
Uyu mushinga ufatwa nk’intambwe ikomeye mu guteza imbere ubukerarugendo bushingiye ku bidukikije ndetse no kumenyekanisha u Rwanda nk’ahantu heza h’amahoro n’ubusitani karemano.
Irene Murerwa, Umuyobozi Mukuru ushinzwe Ubukerarugendo muri RDB, yavuze ko iri ari amahirwe akomeye ku Rwanda yo gusangiza amahanga amateka, imiterere, n’ubwiza bw’umwihariko bya Nyungwe.
Ati” Twishimiye gufatanya na Mandai Wildlife Group mu kugaragaza u Rwanda nk’icyerekezo cy’ubukerarugendo bushingiye ku bidukikije. Ubu bufatanye ni igisubizo ku ntego zacu zo kumenyekanisha ibyiza nyaburanga u Rwanda rufite, no gutanga amahirwe yo kurusura no kurwiyumvamo.”
Dr. Cheng Wen-Haur, Umuyobozi Ushinzwe Ubuzima n’Imikorere muri Mandai Wildlife Group, yashimye ubufatanye n’u Rwanda, avuga ko ari uburyo bwiza bwo gusangiza amahanga inkuru z’uburyo bwo kubungabunga urusobe rw’ibinyabuzima.
Ati: “Ku bufatanye na RDB n’Ambasade y’u Rwanda, dushoboye gushyira imbere inkuru zifatika zigaragaza isano iri hagati y’abantu n’urusobe rw’ibinyabuzima. Ibi bituma abantu barushaho kubyitaho no kubibungabunga.”
Pariki y’Igihugu ya Nyungwe iri mu burengerazuba bw’u Rwanda, ikaba icumbikiye amoko y’ibimera arenga 1,060, inyoni zisaga 320, n’amoko 13 y’inyamaswa zo mu muryango w’inkende. Ifite ibikorwa byinshi byo kwidagadura nka Canopy Walkway, zipline, n’ibindi bikurura ba mukerarugendo.
