Minisitiri w’ubuzima Dr. Sabin Nsanzimana yatangaje ko u Rwanda rugiye gutangira gukingira virusi ya Marburg bahereye ku baganga n’abakora ku mavuriro.
Ibi Minisitiri w’ubuzima yabitangaje mu kiganiro yagiranye n’itangazamakuru aho yari kumwe n’umuyobozi uhagarariye Ishami ry’Umuryango w’abibumbye ryita k’ubuzima, OMS, mu Rwanda, Dr. Brian Chirombo.
Minisitiri w’ubuzima yavuze ko kur’ubu u Rwanda rufite imiti ibiri ifasha abarwayi bafite virusi ya Murburg ariyo Remdesivir izwiho guca intege no gukwirakwira kw’iyi virusi na Monoclanal yongera imbaraga mu mubiri w’umurwayi.
Yakomeje asobanura ko mw’ijoro ryahise ku wa 5 Ukwakira 2024, u Rwanda rwakiriye doze 700 z’urukingo ruri butangire gutangwa uyu munsi bahereye ku baganga n’abakora mu mavuriro.
Ati” Inkingo zageze [mu Rwanda] mu ijoro ryakeye, zikaba zamaze kugenzurwa n’ababishinzwe hano mu Rwanda ndetse n’Ikigo cy’Igihugu gishinzwe gukingira bakaba bamaze kuzisuzuma, bari kuzitegura ku buryo uyu munsi tuza gutangira gukingira abantu bashobora kwibasirwa n’iki cyorezo kurusha abandi.”
Yakomeje ahumuriza abantu ko batagomba kugira impungenge z’uru rukingo kuko rwakoreshweje no mu bindi bihugu. Ati ” Abantu ntibagire impungenge. Urukingo rwa Marburg tugiye gutanga rwagiye rukoreshwa no mu bindi bihugu birimo Uganda, Kenya n’ahandi kandi abaruhawe rwabagiriye akamaro.”
Dr. Chirombo uhagarariye OMS mu Rwanda nawe yijeje ubufatanye buzakomeza mu gushaka ibikenewe mu kurwanya iyi virusi ya Marburg.
