U Rwanda rwatangiye gutanga inkingo za Mpox, aho kw’ikubitiro bazahera ku cyiciro cya mbere kigizwe n’abagera ku 10,000 biganjemo abakora kwa muganga, abakora ubucuruzi bwambukiranya imipaka, abakora mu ma hoteri n’ahandi hatuma bashobora kwibasirwa n’iki cyorezo ku buryo bworoshye.
Mu butumwa bwanyujijwe ku mbuga nkoranyambaga za Minisiteri y’Ubuzima, ku wa 19 Nzeri 2024, batangaje ko iki gikorwa kigamije kurwanya icyorezo cya Mpox kibasiye ibihugu bya Afurika, ndetse no mu Rwanda hakaba harabonetse abacyanduye.
Umuvugizi wa Minisiteri y’Ubuzima, Julien Mahoro Niyingabira mu kiganiro aherutse kugira na IGIHE yavuze ko mu ngamba igihugu gifite zo kurwanya iki cyorezo, harimo no gukingira abaturage bahereye kubashobora kwibasirwa kurusha abandi.
Ati“ Ntabwo twatangirira ku bantu bose, hari amatsinda aba afite ibyago byo kwandura kurusha andi, ubwo ni yo umuntu yabanza guheraho bitewe n’inkingo zaba zihari uko zingana, hanyuma nyuma uko byazajya bigaragara ko n’andi matsinda akeneye guhabwa urukingo bakazatekerezwaho. “
Izi nkingo ziri gukwirakwizwa mu bihugu bya Afurika ziri gutangwa n’Umuryango wa Afurika y’Unze Ubumwe.
Kugeza ubu abantu bane bari baranduye MPox mu Rwanda baravuwe barakira. Iyi virusi imaze kugera mu bihugu bya Afurika bigera kuri 13, by’umwihariko mu gihugu cya Repubulika Iharanira Demokarasi ya Congo ahamaze kwandura abagera ku bihumbi 22.
