Ikigo cy’Igihugu Gishinzwe Ibarurishamibare mu Rwanda, NISR, cyatangaje ko ubucuruzi bw’u Rwanda bwazamutseho 11,3% mu gihembwe cya gatatu cya 2025.
Ni mu gihe ibyoherezwa mu mahanga byiyongeraho 12.70%, naho ibyinjizwa bivuye hanze bigabanukaho 9.74% ugereranyije n’igihembwe cya kabiri cya 2025.
Iyi mibare yo kugera ku wa 30 Ukuboza 2025, igaragaza ko ubucuruzi bw’u Rwanda bwageze ku gaciro ka miliyoni 1,932.58 y’amadolari ya Amerika, bingana n’izamuka rya 11.33% ugereranyije n’igihembwe cya kabiri cy’umwaka ushize wa 2025.
Ibyoherezwa mu mahanga bivuye mu gihugu byinjije asaga miliyoni 389.99 y’amadolari, ibitumizwa mu mahanga bifite agaciro ka miliyoni 1,368.93 y’amadolari, ni mu gihe ibicuruzwa byongeye koherezwa mu mahanga (re-exports) byo bifite agaciro ka miliyoni 173.65 y’amadolari ya Amerika.
Muri iki gihembwe cya gatatu, ibyoherezwa mu mahanga bikomoka mu gihugu cy’u Rwanda byiyongereyeho 12.70% ugereranyije n’igihembwe cya kabiri cya 2025, ndetse bigabanukaho 41.53% ugereranyije n’igihembwe cya gatatu cy’umwaka wabanje wa 2024, aho byari kuri miliyoni 389.99 z’amadolari mu 2025 ugereranyije na miliyoni 667 z’amadolari byariho mu 2024.
Ibyatumijwe mu mahanga by’u Rwanda byagabanutseho 9.74% mu gihembwe cya gatatu cya 2025, ugereranyije n’igihembwe cya kabiri cya 2025, ndetse bigabanukaho 21.85% ugereranyije n’igihembwe nk’icyo cya 2024.
Ku bijyanye n’ibicuruzwa byongeye koherezwa mu mahanga (re-exports), byagabanutseho 5.91% mu gihembwe cya gatatu cya 2025 ugereranyije n’igihembwe nk’icyo cya 2024, ariko byiyongeraho 21.94% ugereranyije n’igihembwe cya kabiri cya 2025.
Ibihugu bitanu bya mbere u Rwanda rwoherezamo ibicuruzwa mu mahanga ni Leta Zunze Ubumwe z’Abarabu (UAE), Repubulika Iharanira Demokarasi ya Congo (RDC), u Bushinwa, u Bugande na Luxembourg.
Ku bijyanye n’ibicuruzwa byongeye koherezwa mu mahanga (re-exports), aho byoherejwe cyane ni muri Repubulika Iharanira Demokarasi ya Congo, Etiyopiya, Leta Zunze Ubumwe z’Abarabu, u Burundi, n’u Bugande.
Repubulika Iharanira Demokarasi ya Congo yihariye 95.45% by’ibicuruzwa byose u Rwanda rwongeye kohereza mu mahanga. Ibicuruzwa byongeye koherezwa cyane ni “Ibiribwa n’amatungo” bifite agaciro ka miliyoni 54.75 z’amadolari ya Amerika, hagakurikiraho “Ibikomoka kuri peteroli, amavuta n’ibindi bifitanye isano nabyo” bifite agaciro ka miliyoni 29.72 z’amadolari.
Ibihugu bitanu bya mbere u Rwanda rwatumizagamo ibicuruzwa mu mahanga, bipimwe ku giciro cya CIF (Cost, Insurance and Freight), ni u Bushinwa, Tanzaniya, u Buhinde, Kenya, na Leta Zunze Ubumwe z’Abarabu.
