Ikipe ya Zira FC yo muri Azerbaijan ikinamo umunyarwanda Mutsinzi Ange, yageze mu ijonjora rya kabiri ry’irushanwa rya UEFA Conference League nyuma yo gusezerera ikipe ya Torpedo Kutaisi yo muri Georgia ku giteranyo cy’ibitego 6-0.
Mu ijoro ryo kuri uyu wa Kane tariki 16 Nyakanga 2026 nibwo hakinwe imikino yo kwishyura y’ijonjora rya mbere rya UEFA Conference League harimo n’umukino Torpedo Kutaisi yakiriyemo Zira FC kuri Ramaz Shengelia Stadium.
Umukino ubanza warangiye Zira FC itsinze ibitego 3-0 ndetse Mutsinzi Ange yari yabanje mu kibuga, anakina umukino wose.
Ninako byagenze mu mukino wo kwishyura nawo ikipe ya Zira Fc yatsinze ibitego 3:0 ndetse Mutsinzi Ange yakinnye iminota yose, afasha ikipe ye kwitwara neza irangiza imikino ibiri itinjijwe igitego.
Muri rusange Zira FC yakomeje mu ijonjora rya kabiri ari naryo ribanziririza irya nyuma, itsinze Torpedo Kutaisi ku giteranyo cy’ibitego 6-0.
Kuri uyu wa Gatandatu tariki 18 Nyakanga 2026 nibwo hategerejwe tombola y’uko amakipe azahura mu ijonjora rya kabiri rya UEFA Conference League.
UEFA Conference League ni irushanwa ritegurwa n’Impuzamashyirahamwe y’Umupira w’Amaguru ku Mugabane w’Uburayi kuva muri 2021, ryitabirwa n’amakipe yabaye aya gatatu meza iwayo inyuma yayitabira UEFA Champions League na UEFA Europa League.
