Umugaba Mukuru w’Ingabo za Repubulika ya Santarafurika (FACA), General Zéphirin MAMADOU, uri mu ruzinduko rw’akazi mu Rwanda, yagiranye ibiganiro n’ubuyobozi bw’Ingabo z’u Rwanda (RDF) ku Cyicaro Gikuru cyazo giherereye ku Kimihurura.
Yakiriwe n’Umugaba Mukuru w’Ingabo z’u Rwanda, Gen MK Mubarakh, ku wa Kabiri tariki 3 Ugushyingo 2026.
Muri uru ruzinduko, General MAMADOU yagiranye ibiganiro na Minisitiri w’Ingabo, Juvenal Marizamunda, mu rwego rwo gushimangira ubufatanye mu bya gisirikare busanzwe hagati y’u Rwanda na Repubulika ya Santarafurika.
Ibiganiro byahuje impande zombi byari bigamije kurebera hamwe uburyo bwo kurushaho gushimangira umubano n’ubufatanye bisanzweho, hibandwa by’umwihariko ku mahugurwa ya gisirikare, ubufatanye mu bikorwa bya gisirikare ndetse no gushyira mu bikorwa amasezerano impande zombi zasinyanye.
Muri uru ruzinduko, General MAMADOU, ari kumwe na mugenzi we w’u Rwanda, Gen MK Mubarakh, banitabiriye umuhango wo gusoza amahugurwa y’ibanze y’ibikorwa bya gisirikare bidasanzwe yitabiriwe n’abasirikare 254 ba Repubulika ya Santarafurika mu Kigo cy’Amahugurwa ya gisirikare cya Nasho, mu Karere ka Kirehe.
Uru ruzinduko rushimangira ubushake bw’u Rwanda na Repubulika ya Santarafurika bwo gukomeza kwimakaza ubufatanye mu bya gisirikare, binyuze mu biganiro bihoraho, kongerera ubushobozi ingabo no gufatanya mu zindi nzego zifitiye impande zombi inyungu.
