Umuhungu wa perezida wa Repubulika Iharanira Demokarasi ya Congo, Anthony Tshisekedi, yarasiye abantu batatu mu kabari ki Kinshasa.
Amakuru avuga ko uyu muhungu w’umukuru w’igihugu cya RDC, yarashe umuntu mu rukerera rwo kuri uyu wa gatandatu, tariki ya 4 Ukwakira 2025.
Nk’uko aya makuru abivuga nuko yashwaniye muri kamwe mu tubari two mu mujyi wa Kinshasa birangira arashe abantu batatu.
Amashusho yakwirakwijwe ku mbugankoranyambaga agaragaza abo bivugwa ko bari muri ako kabari barimo barwana no kugasohokamo, akaba ari no muri icyo gihe yagize abo arasa barakomereka.
Akabari neza yabarasiyemo ni akitwa Nuvo gaherereye muri komine ya Gombe i Kinshasa.
Kugeza ubu ntacyo polisi y’i Kinshasa iratangaza kuri aya makuru, ariko amakuru yo ku ruhande avuga ko yarashe abantu batatu, muri bo umwe arakomereka bikabije.
Binavugwa kandi ko mbere yuko Antony Tshisekedi atangira kurasa yabanje gushwana n’uwitwa Jessy Bukasa.
Byanavuzwe kandi ko uyu Anthony akunze kugaragara mu tubari two mu mijyi ikomeye yo hirya no hino ku isi ashwana n’abo basangira.
Rodriguez Katsuva Mumbere umwe mu banyamakuru bakurikirana ibibera muri RDC yatanze ubutumwa avuga ko yiboneye Anthony ashwanira mu tubari 2.
Yagize ati: “Si ubwa mbere uyu muhungu wa Tshisekedi ashwanira mu tubari, ubwanjye njyenyine maze kumwibonera inshuro 2.”
Abanyekongo bakomeje kwibaza banategereza icyo inzego z’umutekano n’ubutabera by’umwihariko Polisi yiki gihugu ziza gukora ngo abahohotewe barenganurwe.
