Umusaruro mbumbe w’u Rwanda mu gihembwe cya kabiri cya 2024 wazamutse ku kigero cya 9.8% ugera kuri miliyari 4.515Frw, uvuye kuri miliyari 3.972Frw, wari uriho mu gihembwe cya kabiri cya 2023. Mu byiciro bitandukanye ubuhinzi bwiyongereye kuri 7%, inganda ziyongera 15%, naho serivisi ziyongeraho 10%.
Mu buhinzi, umusaruro w’ibihingwa ngandurarugo wiyongereyeho 8% naho umusaruro w’ibihimbwa byoherezwa mu mahanga wagabanutseho 6% ugereranyije n’igihembwe cya kabiri cya 2023.
NISR isobanura ko impamvu yatumye ibyoherezwa mu mahanga bigabanuka ari umusaruro w’ikawa y’u Rwanda wagabanutse kubera ko ifite ibiti bishaje, ariko hakaba hagiye guterwa ibiti bishya.
Mu nganda izamuka ry’umusaruro uruhare runini rungana na 18% rushingiye ku musaruro w’imirimo y’ubwubatsi ndetse n’izamuka rya 17% ry’umusaruro w’inganda zitunganya ibintu bitandukanye, naho umusaruro w’amabuye y’agaciro wagabanutseho 2% ugereranyije n’igihembwe cya kabiri cya 2023.
Muri serivisi, umusaruro w’ubucuruzi budandaza n’uburanguza, wiyongereyeho 10%, uw’ibikorwa by’ubwikorezi wiyongeraho 9% bitewe ahanini n’ubwikorezi bwo mu kirere bwiyongereyeho 25%.
Umusaruro w’amahoteli na resitora wiyongereyeho 20%, umusaruro wa serivisi z’ikoranabuhanga n’itumanaho wiyongeraho 33%, mu gihe uwa serivisi z’ibigo by’ubwishingizi wiyongeyeho 10%.
