Urwego rw’Igihugu rw’Imiyoborere (RGB) rwerekanye ibyavuye mu bushakashatsi bwa 11, bwerekana igipimo cy’imiyoborere mu Rwanda, aho inkingi y’Umutekano yaje ku mwanya wa mbere mu byishimirwa n’abaturage ku kigero cya 93.82%.
Ubu bushakashatsi bwatangiye gukorwa muri 2011, bugaragaza uko imiyoborere ihagaze mu nzego umunani zitandukanye z’igihugu.
Muri uyu mwaka wa 2024, urwego rwaje ku mwanya wa mbere ni umutekano n’ituze ry’abaturage bifite amanota 93.84%, mu gihe ku mwanya wa munani hari inkingi irebana no kuzamura imibereho myiza y’abaturage ifite 75.21%.
RGB igaragaza ko ibijyanye n’umutekano rusange w’igihugu byishimiwe n’abaturage ku gipimo cya 95.54%, kubungabunga umutekano biri kuri 96,92%, mu gihe ubumwe n’ubwiyunge n’imibanire by’Abanyarwanda biri kuri 95,32%.
Iyubahirizwa ry’amategeko riri ku gipimo cya 88.51%, mu gihe uburenganzira mu bya Politiki n’ubwisanzure bw’abaturage biri kuri 88.00%.
Kurwanya ruswa no gukorera mu mucyo biri ku kigero cya 86.64%, bigaragara ko cyagabanutse ugereranyije na 88.97% yari iriho mu 2023.
Inkingi y’imiyoborere abaturage bagizemo uruhare kandi idaheza iri kuri 85.84%, mu gihe imitangire ya serivisi yagabanutse ugereranyije na 2023, aho iri kuri 75.79%, yaravuye kuri 79.98%, naho inkingi irebana no kuzamura imibereho myiza y’abaturage ikaza inyuma ifite 75.21%.
Ubu bushakashatsi bugaragaza ko mu Rwanda habayeho izamuka ry’imiyoborere, ariko hagikenewe gushyirwa ingufu mu kubaka ubukungu burambye no kunoza serivisi zifasha abaturage.
