Abanyeshuri barangije amashuri yisumbuye bafashwa n’Umuryango ‘Imbuto Foundation’, bitabiriye itorero ryateguwe kubufaranye na Minisiteri y’Ubumwe bw’Abanyarwanda n’lnshingano Mboneragihugu, MINUBUMWE.
Iri torero riri kubera mu Kigo cy’Ubutore cya Nkumba ryatangiye ku wa gatatu tariki ya 23 Ukwakira 2024, rigamije guhuza urubyiruko rugatozwa uburyo bwiza bw’imibereho, amateka y’igihugu, indangagaciro na kirazira by’umuco Nyarwanda n’imyifatire ikwiye kubaranga.
Iri torero rifite insanganyamatsiko igira iti “ Imbuto Zitoshye” rifite intego yo gufasha abagenerwabikorwa ba Imbuto Foundation kwigirira akamaro no kukagirira abandi, kubongerera ubumenyi bwunganira ubwo mu ishuri, kubagaragariza icyerekezo cy’igihugu n’uruhare rwabo mu kukigeraho n’ibindi.
Ni itorero ryitabiriwe n’urubyiruko rugera kuri 279 rwasoje amashuri y’isumbuye, rikaba rizamara iminsi itandatu aho rizasozwa tariki ya 30 Ukwakira 2024.
Abitabiriye iri torero bazatozwa binyuze mu biganiro, imikoro ishingiye ku mateka, imikorongiro yuzuzanya n’ibiganiro bizahatangirwa, ndetse hazabamo no gukora imyitozo ngororamubiri, akarasisi ka gisirikare n’ibindi.
