Itsinda ry’Urubyiruko rubarizwa mu Muryango w’Abanyarwanda batuye muri Afurika y’Epfo, rwasuye Icyicaro gikuru cy’Ingabo z’u Rwanda (RDF), basobanurirwa intambwe u Rwanda rumaze gutera mu bumwe, ubwiyunge n’iterambere.
Uru rubyiruko rugizwe n’abahungu n’abakobwa 12, rwasuye icyicaro gikuru cy’Ingabo z’u Rwanda (RDF) giherereye Kimihurura, kuri uyu wa Gatatu, tariki ya 8 Ukwakira 2025.
Bakiriwe n’Umuvugizi w’Ingabo z’u Rwanda, Brig Gen Ronald Rwivanga, wari uhagarariye Umugaba Mukuru w’Ingabo z’u Rwanda, Gen MK Mubarakh.
Muri uru ruzinduko, urubyiruko rwasobanuriwe urugendo rw’ivugururwa no kwiyubaka kwa RDF kuva Jenoside yakorewe Abatutsi irangiye mu 1994.
Banamenyeshejwe intambwe u Rwanda rumaze gutera mu bumwe n’ubwiyunge, iterambere, ndetse n’uruhare rukomeye rw’urubyiruko mu kubungabunga no guteza imbere ibyagezweho.
Uru rubyiruko ruzamara iminsi 10 mu Rwanda muri gahunda yo gufasha Abanyarwanda baba mu mahanga gusura u Rwanda no kunguka ubumenyi buzabafasha gusobanurira abandi ibyiza byarwo izwi nka ‘Come and see, go and tell’.
Ni gahunda yagizwemo uruhare na Minisiteri y’Ububanyi n’Amahanga n’Ubutwererane yiswe “RCA-ZA Youth Connection Tour”, rugaragaza imbaraga Guverinoma y’u Rwanda ikomeje gushyira mu gukorana n’ababa muri ‘Diaspora’ mu kugera kuri Gahunda ya Kabiri ya Guverinoma yo Kwihutisha Iterambere (NST2), no kwimakaza ubumwe mu gihugu.
