Impuzamashyirahamwe y’Umukino wa Volleyball muri Afurika, CAVB, yatangaje urutonde ntakuka rw’amakipe 16 azitabira imikino y’Igikombe cya Afurika cya volleyball cy’ibihugu mu bagabo 2026, arimo n’ikipe y’Igihugu y’u Rwanda.
Iki Gikombe cya Afurika kizabera i Kinshasa muri Repubulika Iharanira Demokarasi ya Congo kuva tariki 7 Nzeri kugeza tariki 21 nzeri 2026.
CAVB yemeje uru rutonde nyuma y’imikino yo gushaka itike y’iki gikombe yagiye ibera mu turere dutandukanye (Zone).
Ikipe y’Igihugu y’u Rwanda yabonye itike yo kuzakina Igikombe cya Afurika bidasabye ko inyura mu mikino yo gushaka itike yabereye i Kampala muri Uganda, kuko iri ku mwanya mwiza ku rutonde rw’amakipe yo muri Afurika, u Rwanda ruri ku mwanya wa 6 mu makipe yo muri Afurika.
Amakipe yabonye itike binyuze mu mikino y’akarere ka gatanu (V) ni Kenya na Uganda.
Andi makipe azitabira iyi mikino arimo Repubulika Iharanira Demokarasi ya Congo izayakira, Misiri ifite igikombe giheruka, Algeria, Libya, Cameroon, Tunisia, Tchad, Maroc, Ghana, Gambia, Nigeria, Repubulika ya Santarafurika na Zimbabwe.
Guérin yahamagaye urutonde rw’agateganyo rw’abakinnyi 21 rurangajwe imbere na kapiteni w’iyi kipe Dusenge Wicklif usanzwe ukinira Kepler VC.
Guérin azungirizwa na Musoni Fred na Ntawangundi Dominique, naho Sibomana Placide azaba ashinzwe kongerera ingufu abakinnyi (Physical Trainer).
Mu Gikombe cya Afurika giheruka cya 2023 cyabereye mu Misiri n’ubundi cyegukanwe na Misiri itsinze Algeria ku mukino wa nyuma, u Rwanda rwarangirije ku mwanya wa 6 mu makipe 15 yari yakitabiriye.
Amakipe yari yitabiriye Igikombe cya Afurika cya 2023 atarabashije kongera kubona itike y’Igikombe cy’uyu mwaka ni Senegal, Tanzania, Burundi na Mali.
