Umutoza w’amakipe y’Igihugu y’u Rwanda ya volleyball, umufaransa Frédéric Guérin, yahamagaye abakinnyi 21 bagiye gutangira imyitozo bitegura imikino y’Igikombe cya Afurika iteganyijwe kubera i Kinshasa muri Repubulika Iharanira Demokarasi ya Congo mu kwezi gutaha.
Kuri uyu wa Gatandatu tariki 18 Nyakanga 2026 nibwo umutoza Guérin yahamagaye abakinnyi 21 b’agateganyo mbere yo gukora urutonde ntakuka.
Bamwe mu bakinnyi basanzwe bahamagarwa mu ikipe y’igihugu nka Muvara Ronard, Ndayisaba Sylvestre, na Niyogosubizo Samuel ‘Tayson’ ni bamwe mu batahamagawe naho Sibomana Placide ‘Madison’ yashyizwe mu itsinda ry’abatoza aho azaba ashinzwe kongerera ingufu abakinnyi.
Abakinnyi barimo Nolan Enzo Ganza ukinira Nyanza TSS asaranganya imipira (Setter) ni umwe mu batunguranye ahamagarwa bwa mbere mu ikipe y’igihugu nkuru.
Abandi bahamagawe bwa mbere barimo Ntawiha Kenny na Munyamahoro D’amour ba APR VC, Munyinya Thierry wa Kirehe VC, Rukundo Willy wa Gisagara, Mugisha Jean Santerre wa REG VC, na Rwanyonga Alex wa Police VC.
