Urwego rw’Igihugu rushinzwe Ubugenzacyaha (RIB) rwatangaje ko rwataye muri yombi Victoire Ingabire Umuhoza akurikiranyweho kurema umutwe w’abagizi ba nabi no gushishikariza itsinda ry’abantu gukwirakwiza ibikorwa bigamije guhungabanya umutekano n’umudendezo w’igihugu.
RIB yifashishije urubuga rwa X yatangaje ko Ingabire washinze ishyaka rya DALFA-Umurinzi yatawe muri yombi ku mugoroba wo ku wa Kane tariki ya 19 Kamena 2025.
Ifatwa rya Ingabire ryabaye mu masaha
make nyuma y’uko yitabye Urukiko Rukuru nyuma yo kuvugwa kenshi mu rubanza ruri gukurikiranwamo abandi bantu barimo na Sibomana Sylvain.
RIB yagize iti” Itabwa muri yombi rya Victoire Ingabire ryategetswe n’urukiko nyuma y’uko ashyizwe mu majwi kenshi mu rubanza rw’abaregwa barimo Sibomana Sylvain n’abandi.”
RIB yakomeje ivuga ko Ingabire akurikiranyweho “Uruhare mu gushinga umutwe w’abagizi ba nabi no gukora ibikorwa bigamije guteza imvururu mu baturage.”
Kuri ubu afungiye kuri sitasiyo ya RIB i Remera mu gihe dosiye ye yitegura gushyikirizwa Ubushinjacyaha Bukuru.
Ifatwa rye ryabaye nyuma y’uko yitabye Urukiko Rukuru asubiza ku butumire yahawe mu rubanza ruregwamo abantu icyenda barimo n’umunyamakuru wa YouTube Theoneste Nsengimana, aho bose baregwa gucura umugambi wo guhirika ubutegetsi bw’igihugu.
Ubushinjacyaha buvuga ko aba bantu baregwa gucura imigambi yo guhungabanya umutekano w’igihugu no guteza imvururu mu baturage.
Victoire Ingabire yigeze gufungwa mu 2013 akatirwa imyaka 13 y’igifungo azira ibyaha birimo kugambirira guhungabanya umutekano w’igihugu, ariko yaje kurekurwa mu 2018 ari kumwe we n’abandi basaga 2,100 nyuma y’imbabazi za Perezida Paul Kagame.
