Minisitiri w’Ububanyi n’Amahanga n’Ubutwererane, Amb. Olivier Nduhungirehe, ari i Singapore aho yitabiriye inama zirimo ihuza ba Minisitiri b’Ububanyi n’Amahanga bo muri Afurika na Singapore izwi nka Singapore-Africa Ministerial Exchange Visit (SAMEV), ndetse n’Inama Mpuzamahanga y’Ubucuruzi hagati ya Afurika na Singapore, Africa-Singapore Business Forum (ASBF).
Izi nama zombi zirimo kubera i Singapore kuva ku wa 26 kugeza ku wa 28 Kanama 2025, zikaba zigamije gushimangira ubufatanye mu by’ubukungu, ishoramari, ikoranabuhanga, ndetse no gusangira ubunararibonye mu miyoborere n’iterambere rirambye.
Inama ya SAMEV yatangijwe mu 2014, ikaba igamije guteza imbere ubufatanye hagati ya Afurika na Singapore mu nzego zitandukanye zirimo iterambere rirambye, guhanga udushya, ikoranabuhanga, uburezi, n’imiyoborere.
Mu nama y’uyu mwaka, yitabiriwe na ba Minisitiri b’Ububanyi n’Amahanga 14 baturutse mu bihugu bya Afurika birimo Botswana, Côte d’Ivoire, Ghana, Kenya, Liberia, Madagascar, Nigeria, u Rwanda, Sierra Leone, Somalia, Afurika y’Epfo, Tanzania, Uganda na Zimbabwe.
Iyi nama iyobowe na Minisitiri w’Ububanyi n’Amahanga wa Singapore, Dr. Vivian Balakrishnan, abayitabiriye baraganira n’abayobozi bo ku rwego rwo hejuru muri Singapore barimo Minisitiri w’Intebe akaba na Minisitiri w’Imari, Lawrence Wong, ndetse na Minisitiri w’Ibidukikije n’Ubutwererane mu Bucuruzi, Grace Fu.
Abagize iyi nama kandi bazagirana ibiganiro n’abandi bayobozi bakuru b’igihugu cya Singapore barimo ba Minisitiri n’Abanyamabanga ba Leta mu nzego z’uburezi, imijyi, ubwikorezi, ubucuruzi n’ububanyi n’amahanga.
Uretse inama ya SAMEV, Minisitiri Nduhungirehe yitabiriye kandi inama ya munani y’Ubucuruzi hagati ya Afurika na Singapore (Africa-Singapore Business Forum, ASBF), itegurwa na Enterprise Singapore.
Iyi nama yatangijwe mu 2010, ikaba iba buri myaka ibiri igahuza abayobozi mu nzego za Leta n’abikorera bo ku rwego rwo hejuru baturutse mu bihugu birenga 40 byo ku migabane ya Afurika, Aziya n’ahandi.
ASBF ni urubuga rw’ubucuruzi n’ishoramari rufasha mu gushimangira umubano w’ubucuruzi hagati y’Afurika na Singapore, higanjemo ibiganiro hagati y’abashoramari n’abayobozi, imurikabikorwa ndetse n’amasezerano y’ubufatanye.
U Rwanda na Singapore bifitanye umubano ushingiye ku bufatanye mu by’ubukungu, ikoranabuhanga, imiyoborere n’uburezi. Mu myaka ishize, Singapore yabaye imwe mu bihugu byagaragaje ubushake bwo gushora imari mu Rwanda, cyane cyane mu nzego z’ikoranabuhanga, ubwikorezi, n’ubucuruzi.
