Kompanyi y’Indege ya RwandAir yagabanyije ibiciro by’ingendo ku kigero cya 50%, kugeza ku itariki ya 31 Kanama 2025.
Iri gabanyirizwa ry’ibiciro by’ingendo ku kigero cya 50%, rizahabwa abagenzi bazagura amatike ku va ku wa Gatanu tariki ya 29 kugeza ku Cyumweru tariki ya 31 Kanama 2025.
Ni amahirwe yihariye agenewe abifuza gukora ingendo zitandukanye mu bice bisaga 23 bigendwamo na RwandAir.
Mu itangazo ryasohowe na RwandAir, kuri uyu wa gatatu, rivuga ko iri gabanyirizwa ryihariye rizafasha abifuza kujya mu biruhuko, gutembera imijyi, cyangwa gukora ingendo z’igihe gito kubona amatike ahendutse kurusha igiciro cyari gisanzwe.
Amatike yagabanyijwe arimo ayerekeza mu mijyi nka Dubai, Johannesburg, Lagos, Paris, n’ahandi, bityo bikaba ari amahirwe ku bashaka gusura Afurika no hanze yayo ku giciro gito.
RwandAir ikomeje kwagura ibikorwa byayo no kwegereza abakiriya serivisi zinoze kandi zihendutse, mu rwego rwo guteza imbere ubukerarugendo no koroshya ingendo mpuzamahanga.
