Mu rwego rwo guteza imbere imibereho y’abaturage bagiye kwimurwa mu gice kizagurirwamo Pariki y’Ibirunga, hafunguwe ku mugaragaro ikigo cy’ubuhinzi bw’imboga giherereye mu Murenge wa Kinigi, mu Karere ka Musanze.
Iki kigo, cyatashywe ku mugaragaro kuri uyu wa gatanu, tariki ya 29 Kanama 2025, n’Umuyobozi Mukuru w’Urwego rw’Igihugu rushinzwe Iterambere (RDB), Jean-Guy Afrika, ari kumwe n’Umunyamabanga wa Leta ushinzwe Ubuhinzi n’Ubworozi, Dr Telesphore Ndabamenye.
Ni ikigo gifite intego yo guteza imbere ubuhinzi bw’ibihingwa byerera mu turere duhana imbibi na Pariki y’Ibirunga.
Iki kigo gishya cyubatswe ku bufatanye bw’Urwego Rushinzwe Iterambere, RDB, Umuryango nyafurika wita ku bidukikije (AWF – African Wildlife Foundation), hamwe n’Ikigo cy’Abaholandi gikora ubuhinzi hifashishijwe ikoranabuhanga, Holland Greentech.
Ni igice cy’umushinga mugari wo kuzamura imibereho y’abaturage baturiye Pariki y’Ibirunga, no kurinda urusobe rw’ibinyabuzima, ‘Volcanoes Community Resilience Project’.
Iki kigo cy’ubuhinzi gifite ibyumba bitatu birimo; aho gukonjeshereza imboga kugira ngo zidasaza vuba, aho kuzogereza, gutoranya no gupfunyika umusaruro mu buryo bugezweho.
Harimo kandi n’ahantu ho guhinga inyanya, cocombre na puwavuro (greenhouses).
Ni igikorwa cyatangiye gushyirwa mu bikorwa mu rwego rwo kwitegura kwimura imiryango 510 izimurwa ahazagurirwa Pariki y’Ibirunga, aho hamaze kugurwa ubutaka bungana na hegitari 50.
Abo baturage bazatuzwa mu Mudugudu w’Icyitegererezo uzaba ugizwe n’amazu agezweho n’ibikorwaremezo bibafasha mu buzima bwa buri munsi ndetse n’imirimo ibyara inyungu.
Ni igikorwa kibaye mu rwego rwo gukomeza kwitegura ibirori ngarukamwaka byo Kwita Izina, bigiye kuba ku nshuro ya 20.
