Abadepite bo mu Nteko Ishinga Amategeko batangiye igikorwa cy’Iminsi itatu cyo gusura abaturage mu ntara zose z’igihugu n’umujyi wa Kigali, bareba uburyo hatangijwe igihembwe cy’ihinga 2025 A, n’imbogamizi bagihura nazo ngo zikemurwe k’ubufatanye n’inzego bireba.
Perezida w’Inteko Ishinga Amategeko, Kazarwa Gerturde avuga ko muri iki gikorwa bazareba uko ihingwa ry’iteguwe, ndetse niba abaturage barabashije kubona ibisabwa byose birimo ifumbire n’inyongeramusaruro, kugirango bahinge bazabone umusaruro.
Ati” Tugiye kureba uko ihinga ryiteguwe, tuzareba amafumbire, tuzareba inyongeramusaruro, hariya bazitangira naho bazigurishiriza bose tuzabasura, ikindi nuko tuzareba n’uburyo amafumbire atangwa, ndetse n’ubwo buhinzi.”
Mu ntangiriro z’igihembwe cy’ihinga cya 2025 A hagaragaye imvura nke, k’uburyo abaturage bari bagiriwe inama yo guhinga ibihingwa byera vuba, bikenera imvura nke nk’ibijumba, ibishyimbo n’imyumbati.
Kazarwa Gerturde akomeza avuga ko hazarebwa n’igikurikiraho nyuma y’uko umuturage ahinze akeza, kugirango bazakore ubuvugizi ku muntu wejeje umusaruro we.
Muri iki gikorwa cyatangiye kuri uyu wa Kane tariki ya 24-26 Ukwakira 2024. Abadepite bazasura imishinga y’Ubuhinzi n’Ubworozi mu ntara zose z’igihugu n’umujyi wa Kigali.
Biteganyijwe kandi ko bazaganira n’abayobozi n’inzego zibanze, bagaruka ku bibazo abaturage bagiye babagaragariza mu ngendo ziheruka niba byarakemuwe.
Abadepite bazaboneraho gushimira abaturage uruhare bagize mu migendekere myiza y’amatora ya Perezida wa Repubulika n’amatora yabagize Inteko ishinga Amategeko, gisozwe no kwifatanya n’abaturage mu muganda rusanjye usoza ukwezi ku Kwakira 2024.
