Kuri uyu wa gatanu, tariki ya 25 Ukwakira 2024, Muri Stade ya Kaminuza y’u Rwanda Ishami rya Huye, habereye umuhango wo gutanga impamyabumenyi ku banyeshuri basaga 8200, basoje amasomo yabo muri UR mu mwaka wa 2024.
Muri iki gikorwa kibaye ku nshuro ya 10 muri UR, abanyeshuri 53 bahawe impamyabumenyi y’ikirenga (PHD), hari 946 bahawe impamyabumenyi y’ikiciro cya gatatu n’abandi 6657 bahawe impamyabumenyi y’ikiciro cya kabiri cya Kaminuza. Bose hamwe harimo abagore 3,109 n’abahungu 4,959.
Umuyobozi Mukuru ya Kaminuza y’u Rwanda, Prof Didas Kayihura Muganga yabwiye aba basoje amasomo ko bahuye n’impinduka zakozwe na Kaminuza y’u Rwanda mu myaka 10 ishize, ariko byabafashije guhinduka abayobozi n’abatekerereza ahazaza.
Ati “Muzibuke guca bugufi. Twizeye ko mwe nka ba ambasaderi ba Kaminuza y’u Rwanda muzagaragaza itandukaniro.”
Minisitiri w’Intebe, Dr. Ngirente Edouard wari umushyitsi mukuru muri uyu muhango, yashimiye Kaminuza y’u Rwanda ikomeje kugaragaza ireme ry’uburezi cyane ko mu basoje amasomo harimo abarenga 100 baturuka mu bihugu 24 bitandukanye byo ku Isi.
Ati “Bigaragaza ko Kaminuza y’u Rwanda ikomeje kunoza ireme ry’uburezi buyitangirwamo ku buryo n’abanyeshuri baturutse hanze y’u Rwanda bishimira kuyigamo.”
Minisitiri Ngirente yibukije abasoje amasomo ko bagomba kurangwa n’indangagaciro zirimo kwirinda kwiyandarika, kwitwara neza, gukunda igihugu no gukomeza kugikorera.
Yabwiye aba banyeshuri ko bahesheje ishema imiryango yabo ndetse n’Igihugu, abibutsa ko igihugu kibatezeho umusaruro ukomeye mu kugiteza imbere ndetse aboneraho kubifuriza ishya n’ihirwe mu bindi bikorwa bagiyemo.
Ati “Guverinoma ibatezeho umusaruro ukomeye mu gukomeza guteza imbere uru Rwanda kandi turabifuriza ishya n’ihirwe mu buzima bwo hanze y’ishuri no mu mirimo itandukanye muzakorera Igihugu cyacu.”
Minisitiri w’Uburezi Nsengimana Joseph yagaragaje ko abasoje amasomo bakoze akazi gakomeye, ndetse ibi bibaha ubudahangarwa mu kuzagira uruhare mu iterambere rirambye ry’igihugu.
