Ku wa mbere, tariki ya 4 Ugushyingo 2024, Urukiko rwa Rubanda rw’i Paris mu Bufaransa, ruratangira kuburanisha ubujurire bwa Philippe Hategekimana wari warakatiwe igifungo cya burundu, kubera uruhare yagize muri Jenoside yakorewe Abatutsi mu 1194.
Muri Kamena 2023, nibwo urukiko rwa Rubanda rw’i Paris mu Bufaransa rwari rwemeje ko Philippe Hategekimana, wari umuyobozi wungirije wa Jandarumori muri Nyanza ya Butare mu 1994, yagize uruhare muri Jenoside yakorewe Abatutsi bari mu bice bya Nyamure, Nyamugari, Nyabubare na ISAR-Songa.
Icyo gihe urukiko rwemeje ko yagize uruhare mw’iyicwa rya Burugumesitiri Nyagasaza Narcisse wayoboraga Ntyazo, ndetse rwemeza ko yaba yaragize uruhare ku ishyirwaho rya bariyeri mu bice bitandukanye bya Nyanza.
Urukiko rwavuze ko Hategekimana atigeze ababazwa na Jenoside yakorewe Abatutsi mu 1994, kuko harubwo yagaragazaga kwibasira abatangabuhamya, ndetse yari yarabanje guceceka imbere y’urukiko ibyo yasobanuraga ko n’ubundi yabonaga nta butabera azahabwa.
Umunyamategeko wa Hategekimana, Me Emmanuel Altit yavuze ko biteguye gusaba urukiko rw’Ubujurire gusuzuma buri buhamya bwatanzwe n’ibimenyetso.
Hategekimana ufite imyaka 67 yatawe muri yombi muri 2018 ubwo yari muri Cameroun, yoherezwa kuburanira i Paris mu Bufaransa ari naho yaratuye.
