Minisiteri y’Ibikorwaremezo mu Rwanda yatangaje ko Guverinoma izahagarika gutanga ibyangombwa kuri moto zikoresha lisansi, ikazajya itanga ibyangombwa kuri moto zikoresha amashanyarazi gusa, mu rwego rwo kwirinda ibihumanya ikirere.
Uyu mushinga ufite intego yo gusimbuza moto zose zikoresha lisansi bitarenze mu ntangiriro z’umwaka wa 2025, mu rwego rwo guteza imbere gutwara abantu n’ibintu mu buryo burambye kandi butangiza ibidukikije no kugabanya imyuka ihumanya ikirere hirindwa ingaruka z’imihindagurikire y’ibihe.
Moto zikoresha amashanyarazi zatangiye gukoreshwa mu Rwanda muri Gicurasi 2019, zikaba zifite batiri zishobora gukora hagati y’ibilometero 65 na 70 ku gikorwa kimwe, hanyuma zigahindurirwa umuriro kuri sitasiyo zabugenewe mu Mujyi wa Kigali, zirimo Rwandex, Nyabugogo, na Kimironko.
Mu bushakashatsi bwakozwe n’ikigo cy’Igihugu cyo Kubungabunga Ibidukikije, REMA, mu 2017, byagaragaye ko izi moto zifite ubushobozi bwo kugabanya umwotsi uhumanya.
Mu mwaka wa 2023, u Rwanda rwari rufite intego yo kugira moto zikoresha amashanyarazi 2,500, mu gihe biteganyijwe ko mu mwaka wa 2024 uzarangira zigeze ku bihumbi 10.
Iyi gahunda ni ingenzi cyane, kuko Minisiteri y’Ubuzima yagaragaje ko buri mwaka mu mavuriro hakirwa miliyoni eshatu z’abivuza indwara z’ubuhumekero, 13% muri zo zikaba ziterwa n’ihumana ry’ikirere.
REMA ivuga ko u Rwanda rufite intego yo kuba igihugu kitohereza imyuka ihumanya mu kirere bitarenze mu mwaka wa 2050, ndetse rukaba rufite na gahunda yo kugabanya imyuka ihumanya ku gipimo cya 38% mu mwaka wa 2030.
