Umuryango w’Abibumbye wambitse imidali y’ishimwe ry’akazi, abapolisi b’u Rwanda 185 bari mu butumwa bwo kubungabunga amahoro muri Sudani y’Epfo (UNMISS).
Umuhango wo gushyikiriza imidali itsinda ry’abapolisi b’u Rwanda rikorera mu Murwa Mukuru Juba muri Sudani y’Epfo, wayobowe na Mussa Gasama, uyobora Ishami rya Polisi y’Umuryango w’Abibumbye (UNPOL) muri icyo gihugu, ku wa Gatandatu, tariki 6 Ukuboza 2025.
Ni imidali ishimangira ubwitange n’umuhate wabaranze mu gihe cy’amezi 11 bamaze mu nshingano zo kurindira umutekano abaturage b’abasivili muri Sudani y’Epfo.
Mussa Gasama yabashimiye umuhate n’ikinyabupfura byabaranze mu kazi ko kurengera abaturage b’abasivili no gufasha Polisi ya Sudani y’Epfo.
Yagize ati “Iyi midali mwambitswe, ni iy’ishimwe ku bwitange bwaranze buri wese muri mwe, ibikorwa byanyu muri rusange bigatanga umusaruro mu kurengera abaturage b’abasivili no gushimangira amahoro n’umutekano muri iki gihugu.”
Yababwiye ko na nyuma yo gusoza inshingano mu butumwa, imidali bahawe izakomeza kubabera ikimenyetso kibatera imbaraga zo gukomeza gukora neza kurushaho n’ahandi bazaba bakorera.
ACP Corneille Murigo uyobora Itsinda ry’Abapolisi b’u Rwanda bari muri Sudani y’Epfo yishimiye kwakira abashyitsi bitabiriye umuhango wo kwambika imidali y’ishimwe abapolisi abereye umuyobozi, anashimira abayihawe ibikorwa by’indashyikirwa byabaranze mu butumwa bw’amahoro muri Sudani y’Epfo.
Abambitswe imidali ni itsinda (RWAFPU3-7) rigizwe n’umubare munini w’abapolisikazi, riyoborwa na SSP Donatha Nyinawumuntu.
ACP Murigo yakomeje ashimira UNMISS, ku buryo ibaba hafi bigatuma babasha kuzuza neza inshingano zabo.
Yavuze ko bakomeje gushyira imbaraga nyinshi mu gucunga umutekano w’abaturage b’abasivili, babikomatanya n’ibikorwa byo guteza imbere imibereho myiza yabo no kurwanya icyashobora kubangamira uburenganzira bw’ikiremwamuntu, ashimira abapolisi ayoboye uko babyitwayemo hatitawe ku mbogamizi bagiye bahura na zo.
ACP Murigo yashimiye ubuyobozi bwa Loni, inzego z’umutekano bahuriye mu butumwa bw’Umuryango w’Abibumbye muri Sudani y’Epfo n’abaturage ku bufatanye babagaragariza, biri mu bibafasha gusohoza neza ishingano zabo zo kubungabunga amahoro.
Abapolisi b’u Rwanda 185 bamaze amezi 11 bageze mu Mujyi wa Juba, bagize rimwe mu matsinda abiri y’abapolisi b’u Rwanda bari mu butumwa bwo kubungabunga amahoro muri Sudani y’Epfo, n’abandi badakorera mu matsinda (IPOs) bose hamwe bagera ku 185, harimo abapolisikazi 95 n’abagabo 90.
