Abanyamuryango ba Unity Club Intwararumuri basuye ababyeyi b’Intwaza batuye mu rugo rw’Impinganzima rwa Bugesera, mu rwego rwo gusabana no kubifuriza iminsi mikuru myiza ibinjiza mu mwaka mushya wa 2026.
Ni igikorwa cyabereye muri uru rugo rw’Impinganzima ruherereye mu Murenge wa Nyamata, mu Karere ka Bugesera, kuri uyu wa Gatanu, tariki ya 12 Ukuboza 2025.
Iki gikorwa kiba buri mwaka, gifite insanganyamatsiko igira iti: “Tubarere nk’uko batureze!”, kigamije kwifatanya n’ababyeyi b’Intwaza batujwe mu ngo z’Impinganzima zirimo urwa Huye, Nyanza, Bugesera na Rusizi.
Aba babyeyi kandi bataramiwe n’abanyeshuri biga mu ishuri ribanza rya Bon Belge rya Nyamata, babafasha kwinjirana ibyishimo mu minsi mikuru ya Noheri n’Umwaka Mushya.
Rita Zirimwabagabo waje uhagarariye Unity Club, akaba ari nawe wari umushyitsi mukuru, yavuze ko buri gihe mu mpera z’umwaka basura urugo rw’ababyeyi b’Intwaza, bakifatanya nabo kwizihiza iminsi mikuru isoza umwaka.
Ati” Buri gihe, mu mpera z’umwaka tuza mu rugo rw’Ababyeyi bacu kugirango tubifurize Noheli nziza n’Umwaka Mushya muhire, kandi tunabagenere impano nk’uko umwana abigenzereza umubyeyi we”
Yaboneyeho gushimira ubuyobozi bwa Leta y’u Rwanda avuga ko nyuma yo guhagarika Jenoside yakorewe Abatutsi, bihutiye gushaka icyakorwa kugirango abarokotse bongere kugira icyanga cy’ubuzima n’icyizere cyo kubaho.
Yashimiye aba babyeyi bafatanyije n’u Rwanda mu rugamba rwo kubaka igihugu, barera abana b’imfubyi bari basigaye nta kivurira, bababera ababyeyi beza n’ubwo nabo ubwabo bari bagihanganye n’inkurikizi za Jenoside.
Yakomoje ku mpanuro za Jeannette Kagame, avuga ko adahwema gushimangira ko Intwaza ari ishuri abato n’abakuru bigiraho, nk’uko yabigarutseho ubwo yifatanyaga n’Intwaza zituye Huye na Nyanza mu Kwibuka ku nshuro ya 30.
Icyo gihe madamu Jeannette Kagame yagize ati” Turabashimira rero, kuko muri ishuri twigiramo ubudaheranwa tuvuga iteka. Kongera kubaho nyuma y’ubuzima mwanyuzemo, muri Jenoside na mbere yayo; mugahera ku busa mukongera kubaho ni ubutwari bukomeye!”
Ingabire Veneranda waje muri uyu muhango ahagarariye Minisiteri y’Ubumwe bw’Abanyarwanda n’Inshingano Mboneragihugu, MINUBUMWE, yavuze ko urugo rw’Impinganzima rwa Nyamata rwatashywe bwa mbere na Madamu Jeannette Kagame muri 2018.
Ingabire yavuze ko rutahwa rwakiriye ababyeyi 35, ndetse muri uwo mwaka mu mezi atatu yakurikiyeho rwakira abandi babyeyi 22 bose hamwe baba 57.
Aba babyeyi bakomeje kugenda biyongera, kugeza ubu habarirwa ababyeyi 71 bose bageze mu zabukuru, barimo abasaza batandatu n’abakecuru 65, aho umuto afite imyaka 57 naho umukuru akagira 98.
Yashimiye Perezida Paul Kagame watekereje ku masaziro y’aba babyeyi ndetse na Madamu Jeannette Kagame uhora ubatekereza umunsi ku wundi, atibagiwe n’Umuryango wa Unity Club udahwema kubaba hafi.
Umwe mu Ntwaza zituye muri uru rugo rw’Impinganzima rwa Bugesera, yavuze ko bishimira ko ubu batakitwa Incike ahubwo bahinduriwe izina bitwa Intwaza, ashimira Akarere ka Bugesera kadahwema kubitaho.
Ati” Turabashimira twari dufite izina ribi ngo turi incike, ariko ubu turi Intwaza. Turi Intwaza dufite abana, baza kudutaramira tukumva ko natwe turi ababyeyi.”
Bashimiye cyane Intwararumuri kubwo kubitaho, kubasura no kubaganiriza bibakora ku mutima, ashimira ubuyobozi bw’Akarere ka Bugesera, avuga ko niyo bagize ibyago babatabara ndetse no mu byiza bakishimana nabo.
Ingo z’Impinganzima zubatswe muri gahunda yatangijwe mu 2014 na Madamu Jeannette Kagame, hagamijwe kubungabunga ubuzima bw’Ababyeyi bageze mu zabukuru barokotse Jenoside yakorewe Abatutsi mu 1994, ikabasiga ari incike, ubu bakaba barahawe izina ry’Intwaza.
