Ikigo cy’Igihugu cy’Ibimenyetso bishingiye ku Bumenyi n’Ubuhanga bikoreshwa mu Butabera (RFI) na Minisiteri ya Siporo byaganiriye ku mushinga wo gushyiraho Laboratwari ipima ikoreshwa ry’imiti yongerera abakinnyi imbaraga.
Ibiganiro byahuje Umunyamabanga wa Leta muri Minisiteri ya Siporo, Rwego Ngarambe n’Umuyobozi Mukuru wa RFI, Dr. Charles Karangwa.
Mu gihe uyu mushinga washyirwa mu bikorwa, yaba ari intambwe ikomeye mu kubahiriza amahame mpuzamahanga agenga siporo.
U Rwanda rugize Laboratwari ipima ikoreshwa ry’imiti yongera imbaraga, byafasha mu gukurikirana no gukumira ikoreshwa ry’imiti itemewe mu marushanwa ya siporo, no kurinda ubuzima bw’abakinnyi.
Uyu mushinga unitezweho kuzamura icyizere cy’amarushanwa ategurwa mu Rwanda, kuko wazatuma yubahiriza ibisabwa n’inzego mpuzamahanga zishinzwe siporo, by’umwihariko amahame y’Ikigo Gishinzwe kugenzura no kurwanya imiti yongera imbaraga ‘ World Anti Doping Agency (WADA).
Ishyirwaho ry’iyi Laboratwari ihuye n’icyerekezo cyo guteza imbere siporo y’umwuga no gutegura abakinnyi bashobora guhatana ku rwego mpuzamahanga.
Mu gihe uyu mushinga washyirwa mu bikorwa, wazaba ari intambwe ikomeye mu kubahiriza amahame mpuzamahanga agenga siporo, no gushimangira isura y’u Rwanda nk’igihugu giteza imbere siporo iboneye, itarangwamo ikoreshwa ry’imiti yongera imbaraga.
