Mu mwaka wa 2025 usize urwego rw’Umuvunyi rukoreye isesengura imanza 555 zingana na 90 % nkuko bikubiye muri raporo y’uru rwego yo muri uwo mwaka.
Raporo y’Urwego rw’Ibikorwa by’uru rwego bya 2024/25 n’ibiteganywa gukorwa mu mwaka wa 2025/26 , igaragaza ko mu 2025, imanza zasabiwe gusubirishwamo zari 39 zirimo abagabo 23 n’abagore 11 n’abandi batanu.
Uru rwego ruvuga kandi ko imanza zarangijwe binyuze mu buhuza ari iz’abantu 16 zirimo abagabo 10 n’abagore batandatu.
Ni mu gihe imanza zahakaniwe gusubirishwamo ari 500 zirimo abagabo 305 n’abagore 214 bangana n’ijanisha rya 90%.
Uru rwego rugaragaza ko mu manza 555 zasesenguwe, 500 zingana na 90%, urwego rw’umuvunyi rwasanze nta karengane kagaragaramo rubimenyesha ba nyirazo.
Muri izo, 39 zingana na 7% zasabiwe gusubirwamo ku mpamvu z’akarengane mu Rukiko rw’Ikirenga, naho 16 (3%) zakemukiye mu buhuza.
Muri izo manza zose ziri mu byiciro bitandukanye birimo imbonezamubano zingana na 383 , inshinjabyaha zingana na 110, ubucuruzi ni 31,ubutegetsi ni 14 n’umurimo 17.
Imanza nyinshi mu zasesenguwe ni iz’imbonezamubano zingana na 383. Muri zo, inyinshi ni izerekeye uburenganzira ku butaka, hakiyongeraho iz’izungura, iz’uburengere, kugabana umutungo utimukanwa nyuma y’ubutane n’izerekeye kutanyurwa n’uburyo cyamunara yakozwemo.
Umuvunyi Mukuru ati “Biriya bibazo by’ubutaka ibyinshi ni amakimbirane ashingiye ku izungura, kugabana umutungo nyuma y’ubutane, kugurisha ubutaka n’ibindi.”
Mu manza 39 Urwego rw’Umuvunyi rwasabiye gusubirishwamo ku mpamvu z’akarengane mu rukiko rw’ikirenga, iz’imbonezamubano ni 25, iz’ubucuruzi ni esheshatu iz’inshinjabyaha ni bane, iz’umurimo ni bibiri n’iz’ubutegetsi babiri.
Umuvunyi Mukuru, Nirere Madeleine, avuga ko hari benshi basubirishamo imanza kubera kutishimira imikirize y’imanza.
Ati “Ku kutishimira imikirize y’imanza usanga abaturage baba bagiye mu nkiko ariko ugasanga ntibanyuzwe n’imyanzuro. Cyane cyane hari aho tubona abaturage badasobanukiwe amategeko bakajya gutanga ikirego, wenda nk’ubujurire igihe cyararenze, ntiyishimire imikirize y’urubanza akumva yararenganye kandi mu by’ukuri ari uko atakurikije inzira ziteganwa n’amategeko, cyangwa se urubanza rukanakurikiza inzira zose ariko akavuga ati sinanyuzwe, ntabwo banshiriye urubanza mu buryo buri bwo mu gihe undi aba avuga ngo nabonye ubutabera.”
Yasobanuye ko mu bibazo bijyanye n’abasubirishamo imanza kubera impamvu z’akarengane hari izakoreshejwemo ubuhuza hagamijwe kwereka abaturage ko buri gihe batagomba kwirukira mu nkiko.
