Umuhanzikazi Bwiza Emerance uri mu murwa mukuru wa Maputo muri Mozambique, aho yagiye mu bikorwa by’akazi, yahuye na Ambasaderi w’u Rwanda muri iki gihugu, Col (Rtd) Donat Ndamage.
Mu butumwa yanyujije ku rubuga rwa X, ku mugoroba wo kuri uyu wa kabiri, tariki ya 26 Ugushyingo 2024, Bwiza yagaragaje ko yishimiye guhura na Ambasaderi w’u Rwanda muri Mozambique, Col (Rtd) Donat Ndamage.
Bwiza usanzwe ari ambasaderi w’aba-Scout mu bikorwa byo kurengera ibidukikije binyuze mu mu mushinga wi ‘Igiti mu rugo’, ari muri Mozambique mu bikorwa bigendanye no gukangurira umuryango Nyarwanda uhatuye gutera ibiti barengera ibidukikije.
Uyu muhanzikazi yashimiye Ambasade y’u Rwanda muri Mozambique, kubwo gushyigikira umushinga wa ‘Igiti Mu Rugo’, avuga ko bishimiye kubona ko umuryango w’Abanyarwanda uhabarizwa ushyigikiye iki gikorwa.
Bwiza yatsinze irushanwa rya ‘Next Diva-Indi Mbuto’ rya Kikac Music Label, bimuhesha amahirwe yo gukorana nabo imyaka ibiri, aho mu mwaka wa mbere bagufasha kumenyekanisha ibikorwa, mu mwaka wa kabiri ugahitamo umushinga wo gukoraho.
Bwiza yahisemo umushinga ujyanye no kurengera ibidukikije, aho bihaye intego yo gutera ibiti nibura ibihumbi 200 mu gihe cy’amezi abiri.
