APR FC yatangaje ko yamaze gutandukana n’Umunya-Nigeria Nwobodo Johnson Chidiebere nyuma y’ubwumvikane bwabaye hagati y’impande zombi.
Ikipe y’Ingabo yatangaje ibinyujije ku mbuga nkoranyambaga zayo ko yatandukanye na Nwobodo Johnson Chidiebere.
Mu butumwa bwayo yagize iti “Ku bwumvikane bw’impande zombi, twamaze gutandukana n’umukinnyi Chidiebere Johnson Nwobodo.’’
Chidiebere Johnson Nwobodo yageze muri APR FC mu mpeshyi ya 2024 ariko ntiyigeze agaragaza urwego ruri hejuru ndetse yagiye akina imikino mike.
Uyu mukinnyi usatira izamu anyuze ku mpande yabengutswe na APR FC kubera ibigwi bye yagaragaje binyuze mu makipe yakiniye nka Enugu Rangers yanabereye Kapiteni.
Chiedebere yabaye umukinnyi wa kabiri watandukanye na APR FC nyuma ya Godwin Odibo.
Icyemezo cyo kurekura aba bakinnyi cyafashwe nyuma y’uko APR FC iguze abakinnyi bashya barimo Abanya-Uganda Hakim Kiwanuka na Denis Omedi ndetse n’Umunya-Burkina Faso Cheikh Djibril Ouattara.
APR FC iri kwitegura imikino y’Igikombe cy’Intwari aho izahura na AS Kigali muri ½ cy’Igikombe cy’Intwari izaba ku wa 28 Mutarama 2025.
Ikipe y’Ingabo iri ku mwanya wa kabiri ku rutonde rw’agateganyo rwa Shampiyona aho ifite amanota 31, inyuma ya Rayon Sports ya mbere, ifite amanota 36.
