Umunyamabanga Uhoraho muri Minisiteri y’Ikoranabuhanga na Inovasiyo (MINICT), Eraste Rurangwa, yatangaje ko ubushakashatsi iyi minisiteri yakoze bwerekanye ko ikoranabuhanga ry’ubwenge buhangano, AI, rizagira uruhare rungana na 6% mu musaruro mbumbe w’Igihugu mu 2030.
Yabitangaje ku wa Kane, tariki 18 Kamena 2026, mu biganiro abakozi ba Minisiteri y’Ikoranabuhanga mu Itumanaho na Inovasiyo, bagiranye n’abagize Ihuriro ry’Igihugu Nyunguranabitekerezo ry’imitwe ya Politiki 11 yemewe mu Rwanda.
Rurangwa yavuze ko ubushakashatsi bakoze bwagaragaje ko Ikoranabuhanga ry’ubwenge buhangano rishobora kongerera ubukungu bw’igihugu agaciro kangana na miliyoni 589$ (Miliyari 862 Frw) ni ukuvuga 6% by’umusaruro mbumbe (GDP) w’Igihugu kugera mu 2030.
Yavuze ko iri koranabuhanga ry’ubwenge buhangano AI ryatangiye gukoreshwa mu nzego zitandukanye zirimo ubuhinzi, ubuvuzi ndetse no mu burezi, rizinjiriza Igihugu ubukungu bwinshi nihakorwa ishoramari rifatika.
Ati “Aka gaciro ntitwakageraho tutashoye imari ihagije mu kubaka ubushobozi, kugirango tugere kuri izi ntego.”
Umuyobozi Mukuru ushinzwe Ikoranabuhanga no guhanga udushya muri MINICT, Esther Kunda, yavuze ko mu nzego AI ikoreshwamo, iri gutanga umusaruro ufatika kugeza ubu.
Yatanze urugero mu rwego rw’ubuhinzi, aho muri Minisiteri y’Ubuhinzi n’Ubworozi (MINAGRI), hari uburyo bwitwa Tunga Agricultural Chatbot bukoreshwa mu gusubiza ibibazo by’abahinzi bagana iyi Minisiteri bakeneye amakuru n’ibisobanuro ikabibaha.
Ati “MINAGRI yari ifite abantu babiri babasha kwitaba abahinzi. Ubu AI iyo itabashije gusubiza cyangwa umuntu atanyuzwe nibwo imwohereza kuri wa mukozi.”
Iri koranabuhanga ry’ubwenge buhangano ryitezweho ko muri 2030 rizaba rifasha kongera umusaruro w’ubuhinzi ku kigero cya 25%, kugabanya ikoreshwa ry’amazi akenerwa mu buhinzi n’ifumbire ku kigero cya 20%, ndetse no kuzamura inyungu umuhinzi avana mu byo akora ku kigero cya 50% ugereranyije n’inyungu akuramo muri iki gihe.
Abagize Ihuriro ry’Igihugu Nyunguranabitekerezo ry’imitwe ya Politiki 11 yemewe mu Rwanda, bagaragaje ko bafitiye ikizere AI, ariko ko hari ibyo basanga byakwitonderwa, birimo kumva neza ko iri koranabuhanga ritaje gusimbura abantu ahubwo rije kubafasha.
U Rwanda mu gushyira mu bikorwa politiki y’ikoreshwa ry’ikoranabuhanga ry’Ubwenge Buhangano, hashyizweho Ikigo cy’Igihugu gishinzwe AI, kigamije kuba urwego rwihariye ruhuza kandi rukurikirana ishyirwa mu bikorwa ry’iyi politiki.
Mu ngamba zacyo z’ibanze harimo guhuza no kwihutisha ikoreshwa rya AI mu nzego za Leta n’iz’abikorera, kubaka ubumenyi n’impuguke mu bijyanye n’Ubwenge Buhangano, kwita ku ngamba zirinda harimo imyitwarire myiza, no kurinda amakuru ndetse no kugenzura uko AI ikoreshwa mu mucyo no mu buryo bwizewe.
