Impuzamashyirahamwe y’umupira w’amaguru muri Afurika y’Iburasirazuba no hagati (CECAFA) yatangaje ko amakipe 11 ariyo azitabira irushanwa rya CECAFA Kagame Cup rizabera mu Rwanda muri Sitade Amahoro no muri Sitade ya Kigali yitiriwe Pele, kuva tariki 24 Nyakanga kugeza tariki 8 Kanama 2026.
Mu makipe yatangajwe ko azitabira irushanwa ngarukamwaka rya CECAFA Kagame Cup 2026 arimo Rayon Sports na APR FC zo mu Rwanda n’ikipe ya Simba SC yo muri Tanzania imaze gutwara iri rushanwa inshuro nyinshi (Inshuro 6) yaherukaga kuryitabira muri 2018.
Andi makipe ni , Vipers SC (Uganda), Al Hilal SC (Sudan), El Merreikh SC (Sudan), Gor Mahia FC (Kenya), Mogadishu City FC (Somalia), Jamus SC (Sudani y’Epfo), FC Garde Republicaine (Djibouti), na KVZ FC (Zanzibar).
Ni ku nshuro ya gatandatu irushanwa rya CECAFA Kagame Cup rizaba rigiye gukinirwa mu Rwanda, ryaherukaga kuhakinirwa muri 2019 ubwo Kampala City Council yo muri Uganda yatwaraga igikombe itsinze Azam FC yo muri Tanzania igitego 1-0 ku mukino wa nyuma.
Muri uwo mwaka wa 2019 ni nabwo Rayon Sports na APR FC zaherukaga kwitabira iri rushanwa zombi icyarimwe, icyo gihe zaviriyemo muri 1/4 aho Rayon Sports yasezerewe na KCCA naho APR FC isezererwa na AS Maniema Union yo muri Repubulika Iharanira Demokarasi ya Congo.
Nyuma y’icyo gihe APR FC yo yitabiriye nanone iri rushanwa inshuro ebyiri, muri 2024 na 2025 gusa ntanarimwe yigeze ibasha kuryegukana.
CECAFA Kagame Cup ni irushanwa ritegurwa n’Impuzamashyirahamwe y’umupira w’amaguru muri Afurika y’Iburasirazuba no hagati (CECAFA) kuva mu 1974, rigahuza amakipe ya mbere yo muri Afurika y’Iburasirazuba n’iyo hagati ndetse n’amakipe aba yatumiwe.
Iri rushanwa ryitiriwe Perezida w’u Rwanda Paul Kagame, kuva muri 2002 ubwo yatangiraga kuritera inkunga.
Kuva iri rushanwa ryatangira gukinwa, Simba SC na AFC Leopards yo muri Kenya niyo makipe amaze kuritwara inshuro nyinshi, aya yombi yaritwaye inshuro 6 naho Young Africans SC yo muri Tanzania na Tusker FC yo muri Kenya zaritwaye inshuro 5.
Amakipe yo mu Rwanda yabashije kwegukana iri rushanwa ni APR FC yaryegukanye inshuro 3 muro 2004, 2007 na 2010, Rayon Spors yaryegukanye inshuro 1 mu 1998 na ATRACO yasenyutse yaryegukanye inshuro 1 muri 2009.
