Amakipe 10 y’abagore arimo Rayon Sports yo mu Rwanda ategerejwe mu Rwanda mu mikino ihuza amakipe yabaye aya mbere muri Afurika y’Iburasirazuba n’iyo Hagati yo gushaka itike y’Irushanwa rihuza amakipe yabaye aya mbere iwayo muri Afurika, CAF Women’s Champions League CECAFA Qualifiers 2026.
Iyi mikino izabera i Kigali kuva tariki 21 Kanama kugeza tariki 31 Kanama 2026.
Kuri uyu wa Kane tariki 30 Nyakanga hategerejwe tombora y’uko amakipe azakina mu matsinda irabera mu cyumba cy’inama cya Sitade Amahoro kuva saa yine n’igice z’amanywa (10:30).
Uretse Rayon Sports izahagararira u Rwanda muri iyi mikino nk’ikipe yatwaye Igikombe cya Shampiyona, andi makipe azitabira iri rushanwa arimo Top Girls Academy (Burundi), FC Ujeco (Djibouti), Commercial Bank of Ethiopia FC (Ethiopia), Denden FC (Eritrea), Kenya Police Bullets (Kenya), Yei Joint Stars (South Sudan), Simba Queens (Tanzania), Kawempe Muslim Ladies (Uganda) na Mafunzo WFC (Zanzibar).
Aya makipe 10 arashyirwa mu matsinda 3, itsinda rimwe rijyemo amakipe 4 naho andi matsinda abiri ajyemo amakipe 3.
Mu itsinda ry’amakipe 4 hazazamuka amakipe 2, naho mu matsinda y’amakipe 3 hazamuke ikipe imwe, ayo makipe 4 azahite ajya muri 1/2.
Mu mikino ya CECAFA y’ubushize, Rayon Sports yari yageze ku mukino wa nyuma ihatsindirwa na JKT yo muri Tanzania.
Iyi kipe ya JKT ntabwo izitabira muri uyu mwaka nyuma y’uko ikipe ya Simba Queens ariyo yegukanye igikombe cya Shampiyona ya Tanzania.
