Urwego Rugenzura Isoko ry’Imari n’Imigabane CMA Rwanda, n’Ikigo Africa Prudential Plc cyo muri Nigeria byasinyanye amasezerano y’ubufatanye (MoU) agamije guteza imbere isoko ry’imari shingiro, kunoza serivisi zihabwa abashoramari no gukoresha ikoranabuhanga rigezweho muri uru rwego.
Aya masezerano ateganya ubufatanye mu bikorwa bitandukanye birimo serivisi zo gucunga inyandiko z’abanyamigabane, imicungire y’impapuro z’agaciro, kumenya no kwemeza umwirondoro w’abashoramari, gucunga amakuru, kongerera ubumenyi abakozi ndetse no gukoresha uburyo bw’ikoranabuhanga mu kunoza serivisi zitangwa ku isoko ry’imari.
Umuyobozi Mukuru wa CMA Rwanda, Romeo Ngarambe, yavuze ko gukorana n’ibigo bifite ubunararibonye ku mugabane wa Afurika bizabafasha kwigira ku bunararibonye bwabyo mu rwego rwo gukomeza guteza imbere isoko ry’imari no kurushaho kunoza serivisi zihabwa abashoramari.
Yagze ati “ Aya masezerano azafasha u Rwanda kubaka urwego rw’imari shingiro rufite ubushobozi bwo guhangana ku rwego mpuzamahanga no gukoresha ikoranabuhanga mu korohereza abashoramari.”
Ku rundi ruhande, Umuyobozi Mukuru akaba n’Umuyobozi Nshingwabikorwa wa Africa Prudential, Dr. Catherine Nwosu, yavuze ko ubu bufatanye bugaragaza akamaro ko gukorana hagati y’ibigo by’imari, gusangizanya ubumenyi no gukoresha ikoranabuhanga mu rwego rwo kurushaho kunoza serivisi zihabwa abashoramari n’abafite imigabane ku masoko y’imari yo muri Afurika.
Aya masezerano na Africa Prudential izafasha CMA Rwanda kugira ubunararibonye mu gucunga inyandiko z’abanyamigabane ndetse no gukoresha ikoranabuhanga rigezweho mu rwego rw’isoko ry’imari.
Impande zombi zizasangizanya ubumenyi ndetse zinafatanye mu kongerera ubushobozi abakozi bakorera muri uru rwego.
Aya masezerano aaje nyuma y’uruzinduko rw’akazi intumwa za CMA Rwanda zagiriye muri Nigeria muri Kamena uyu mwaka, ziyobowe n’Umuyobozi Mukuru Romeo Ngarambe aho basuye Africa Prudential kugira ngo bigire ku bunararibonye bwayo mu gutanga serivisi z’ikoranabuhanga ku bashoramari.
Muri zo harimo; gukoresha inama z’abanyamigabane, gucunga amakuru y’abashoramari no gutora hakoreshejwe uburyo bw’ikoranabuhanga ndetse no gukurikirana ishoramari hakoreshejwe telefone ngendanwa.
