Amakipe ya Yei Joint Stars WFC yo muri Sudani y’Epfo, Kenya Police Bullets WFC yo muri Kenya, Kawempe Muslim Ladies FC yo muri Uganda na Commercial Bank of Ethiopia WFC (CBE WFC) niyo yageze muri 1/2 cy’imikino ya nyuma ya CECAFA y’abagore yo gushaka itike ya CAF Women’s Champions League.
Kuri uyu wa Gatatu tariki 26 Kanama 2026 nibwo hasojwe imikino y’amatsinda muri CECAFA y’abagore hakinwa imikino ibiri yasize hamenyekanye andi makipe 3 yerekeza muri 1/2 nyuma ya Yei Joint Stars yari yayoboye itsinda rya mbere igatera iyo ntambwe.
Iyi mikino yombi yabereye muri Kigali Pele Stadium saa 13:00 na 16:00 yarangiye amakipe yasabwaga gutsinda abashije kubona intsinzi biyahesha itike ya 1/2.
Mu itsinda B, Kawempe Muslims Ladies yitwaye neza inyagira ikipe ya FC Ujeko yo muri Djibouti ibitego 8-0 nyuma y’uko igice cya mbere cyarangiye ari ibitego 6-0.
Kawempe Muslim Ladies yahise igera muri 1/2 nyuma yo kuyobora itsinda n’amanota 6 n’ibitego 9 yizigamye kuko yatsinze imikino yayo yose yo mu itsinda uko ari ibiri.
Mu itsinda C, Kenya Police Bullets yitwaye neza itsinda Top Girls Academy yo mu Burundi ibitego 3-1 biyihesha kugera muri 1/2 nyuma yo guhita iyobora itsinda n’amanota 6.
Nyuma y’uko aya makipe 3 akomeje nk’amakipe yayoboye amatsinda hari hakurikiyeho kureba ikipe yatsinzwe neza mu matsinda 3 kugira ngo nayo igere muri 1/2.
Mu itsinda A byari byarasobanutse Rayon Sports yabaye iya kabiri muri iri tsinda yaramaze gusezererwa kuko n’ubwo yari ifite amanota 5 ariko itegeko rivuga ko mu gihe itsinda ririmo amakipe 4 kandi andi matsinda arimo amakipe 3, mu kubara amanota y’amakipe ari muri iryo tsinda hakurwamo amanota yabonye ku ikipe yabaye iya nyuma.
Ibi byatumye Rayon Sports uyikuriyemo amanota 3 yabonye ku ikipe ya Denden WFC yo muri Eritrea yabaye iya nyuma muri iri tsinda ihita isigarana amanota 2 gusa, bivuze ko urugamba rwari rusigaye hagati ya CBE WFC yo mu itsinda B na Simba Queens yo muri Tanzania yo mu itsinda C zombi zari zifite amanota 3.
Byarangiye CBE WFC ariyo izamutse kuko yari ifite amanota 3 n’ibitego 10 yizigamye mu gihe Simba Queens yari ifite amanota 3 yizigamye igitego 1 gusa.
Imikino ya 1/2 izakinwa tariki 29 Kanama 2026 muri Kigali Pele Stadium, aho umukino umwe uzatangira saa 13:00 naho undi mukino ukazatangira saa 16:00.
Ikipe izegukana igikombe ni yo izahagararira u Rwanda mu mikino ya nyuma ihuza amakipe yabaye aya mbere iwayo muri Afurika, CAF Women’s Champions League.
