Itsinda ry’intumwa 9 ziturutse mu gihugu cya Gambia, zasuye Polisi y’u Rwanda ku cyicaro gikuru ku Kacyiru, mu rwego rwo kunguka ubumenyi no kwigira ku bunararibonye bw’u Rwanda mu bijyanye n’umutekano wo mu muhanda, imicungire y’ubwikorezi ndetse n’imitangire ya serivisi hifashishijwe ikoranabuhanga.
Izi ntumwa zihagarariye Minisiteri y’Ubwikorezi, Imirimo, Ibikorwaremezo n’izindi nzego zifitanye isano na yo muri Gambia, zasuye Polisi y’u Rwanda kuri uyu wa Gatatu tariki ya 26 Kanama, ziyobowe n’ Umunyamabanga Uhoraho wungirije muri iyo Minisiteri, Ebrima Colley.
Bakiriwe n’Umuyobozi Mukuru wungirije wa Polisi y’u Rwanda ushinzwe Ubutegetsi n’Abakozi, DCG Jeanne Chantal Ujeneza.
Yagaragaje akamaro k’uru ruzinduko ashimangira ko rutanga amahirwe ku mpande zombi yo gusangira ubunararibonye no kurebera hamwe uburyo bwafasha kunoza umutekano no gukora neza kwa serivisi z’ubwikorezi bwo mu muhanda.
Yagize ati: “Nubwo mwaje kwigira ku bunararibonye bw’u Rwanda, natwe dushishikajwe no kumenya ubunararibonye n’uburyo mukoresha muri Gambia. Gusangira ubunararibonye bwacu bishobora kugira uruhare mu kunoza imicungire y’umutekano wo mu muhanda mu nzego zacu, ndetse no mu bihugu byacu muri rusange.”
DCG Ujeneza yagaragaje kandi uruhare rw’ikoranabuhanga mu gukomeza ubushobozi bwo gushyira mu bikorwa amategeko no gutanga serivisi za Leta.
Yavuze ko uburyo bw’ikoranabuhanga bushobora kugabanya imikoranire idakenewe cyangwa idahwitse hagati y’abatanga serivisi n’abazihabwa, kugabanya amakosa, gukora mu gihe gito, kongera imikorere myiza no guteza imbere gukorera mu mucyo.
Ati: “Uruhare rw’umuntu mu itangwa rya serivisi rushobora rimwe na rimwe gutuma habaho amakosa. Gukoresha ikoranabuhanga rero bituma akazi koroha kandi kagakorwa neza, bikadufasha kugera ku ntego zacu dushingiye ku bimenyetso, gutanga serivisi nziza no kurushaho gukorera mu mucyo.”
Yanavuze ko umutekano wo mu muhanda nanone ugerwaho ku bufatanye n’abaturage mu byiciro bitandukanye kuko bahabwa ubukangurambaga bwo kubahiriza amategeko n’amabwiriza biwugenga bityo na bo bakumva ko kuyakurikiza ari uruhare rwa buri wese uwukoresha.
Ebrima Colley uyoboye iri tsinda ryavuye muri Gambia, yavuze ko bahisemo u Rwanda kubera intambwe igihugu kimaze gutera mu micungire y’umutekano wo mu muhanda n’ubwikorezi, avuga ko ubunararibonye bazungukira muri uru ruzinduko buzabafasha mu kongera kunoza Politiki z’ubwikorezi muri Gambia.
Yagize ati: “Twabonye ibyo mwagezeho n’ibikorwa byiza mwakoze muri iki gihe. Ni yo mpamvu twasanze ari ngombwa kuza mu Rwanda kugira ngo tubigireho, tubishyire hamwe maze dutegure politiki twese dushobora kwishimira.”
Izi ntumwa zasuye Ishami rya Polisi y’u Rwanda rishinzwe ibinyabiziga n’umutekano wo mu muhanda, ndetse bikaba biteganyijweko zizagirana ibiganiro n’andi mashami ya Polisi nk’Ishami rishinzwe Igenzura ry’Ibinyabiziga ndetse n’Ishami rishinzwe Ibizamini n’Itangwa ry’Impushya zo gutwara Ibinyabiziga.
Uru ruzinduko rwiga ku bunararibonye rwibanze ku iyubahirizwa ry’amategeko agenga umutekano wo mu muhanda n’imicungire yawo, isuzuma n’igenzura ry’imikorere y’ibinyabiziga, ibizamini n’itangwa ry’impushya zo gutwara ibinyabiziga, ndetse no gukoresha ikoranabuhanga mu kunoza imicungire y’urujya n’uruza rw’ibinyabiziga na serivisi z’ubwikorezi rusange.
