Amakipe yo muri Sudan ariko akina Shampiyona y’u Rwanda, BK Pro League, ya Al Hilal SC Omdurman na Al Merrikh SC yitwaye neza akomeza mu ijonjora rya kabiri rya CAF Champions League.
Kuri uyu wa Gatandatu tariki 12 Nzeri 2026 nibwo aya makipe yo muri Sudan yakinnye imikino yo kwishyura mu ijonjora ry’ibanze ry’irushanwa rihuza amakipe yabaye aya mbere iwayo, CAF Champions League.
Al Hilal SC yari yakiriye Aigle Noir yo mu Burundi muri Sitade Amahoro, ni umukino watangiye saa 15:00.
Uyu mukino warangiye Al Hilal yitwaye neza itsinda igitego 1-0 cyatsinzwe na Ahmed M’Bracek ku munota wa 43, bituma ihita isezerera Aigle Noir ku giteranyo cy’ibitego 3-0.
Umukino ubanza wabereye mu Burundi wari warangiye Aigle Noir itsindiwe imbere y’abafana bayo ibitego 2-0.
Al Hilal izahura n’ikipe izakomeza hagati ya Sidama Bunna FC yo muri Ethiopia na Aiglons FC yo muri Chad.
Umukino ubanza warangiye ari 0-0, naho umukino wo kwishyura uzakinwa kuri iki Cyumweru saa 18:00 muri Ethiopia.
Ku ikipe ya Al Merrikh SC yabonye itike yo gukina CAF Champions League nyuma yo gutwara igikombe cya Shampiyona, yari yakiriwe na Power Dynamos F.C yo muri Zambia.
Al Merrikh y’umutoza Darko Nović yagiye muri Zambia ifite impamba y’igitego kuko umukino ubanza wabereye i Kigali wari warangiye itsinze igitego 1-0.
Mu mukino wo kwishura, n’ubundi Al Merrikh yitwaye neza itsinda igitego 1-0 cyatsinzwe na Feno Hasin bituma ihita isezerera Power Dynamos ku giteranyo cy’ibitego 2-0.
Mu cyiciro gikurikiyeho, Al Merrikh izahura na Orlando Pirates yo muri Afurika y’Epfo nyuma y’uko isezereye La Cure Waves SC yo muri Mauritius iyitsinze ku giteranyo cy’ibitego 3-1.
Imikino ibanza y’ijonjora rya kabiri rya CAF Champions League izakinwa hagati ya tariki 16-18 Ukwakira, naho iyo kwishyura ikinwe hagati ya tariki 23-25 Ukwakira 2026.
