Ikipe ya Gisagara VC yamaze gusinyisha umunya-Sudani y’Epfo ukina yatakira inyuma (Opposite hitter) James Achuil avuye mu ikipe ya East African University Rwanda (EAUR).
James Achuil yashyize umukono ku masezerano y’imyaka ibiri akinira Gisagara VC ku wa Gatanu tariki 11 Nzeri 2026, iba ikipe ya gatatu yo mu Rwanda agiye gukinira muri Shampiyona nyuma ya EAUR VC na Police VC.
Achuil uri mu bakinnyi beza ku mwanya we mu bakina mu Rwanda, yanakiniye APR VC mu gikombe gihuza amakipe yabaye aya mbere iwayo giheruka kubera mu Rwanda, 2026 CAVB Men’s Club Championship.
Achuil unakinira ikipe y’igihugu ya Sudani y’Epfo agiye muri Gisagara VC abisikana na Niyogusubizo Samuel uzwi nka Tyson wagiye muri Kirehe VC nyuma yo kurangiza amasezerano.
Tyson yasubiye muri Kirehe VC n’ubundi yakiniye mu myaka 8 ishize, kuko yayiherukagamo muri 2018.
Nyuma yo gutakaza James Achuil ntabwo EAUR VC yarekeye aho kuko yihutiye kumusimbuza nayo ijya muri KCCA isinyisha Umugande Iga Mohammed wari umaze imyaka ibiri ayikinira.
Iga unakinira ikipe y’igihugu y’u Bugande yasinye amasezerano y’umwaka umwe ushobora kongerwa.
Ntabwo Iga nawe ari mushya muri Shampiyona y’u Rwanda kuko n’ubundi yigeze gukinira EAUR VC, ndetse yiyambajwe na REG VC mu irushanwa ryo Kwibuka abazize Jenoside yakorewe Abatutsi mu 1994, GMT, ryabaye muri kamena uyu mwaka.
