Sosiyete Nyarwanda y’Ubwikorezi bwo mu Kirere, RwandAir, yegukanye igihembo cya Best Airline Staff in Africa 2026, gitangwa na Skytrax World Airline Awards, kubera serivisi nziza zitangwa n’abakozi bayo ku bagenzi.
Icyo gihembo cyatangiwe mu muhango wa Skytrax World Airline Awards wabereye i London mu Bwongereza ku wa 18 Nzeri 2026, aho RwandAir yashimiwe ubuziranenge bwa serivisi z’abakozi bayo haba ku bibuga by’indege no mu ndege imbere.
Skytrax igaragaza ko iki cyiciro gipima serivisi zitangwa n’abakozi bahura n’abagenzi, harimo abo ku bibuga by’indege n’abakozi bo mu ndege.
RwandAir yaje imbere ya EgyptAir, Ethiopian Airlines, Kenya Airways na South African Airways, mu gihe Royal Air Maroc, Air Mauritius, Airlink, Cabo Verde Airlines na TAAG Angola Airlines zakurikiyeho muri 10 za mbere muri Afurika.
Umuyobozi Mukuru wa RwandAir, Yvonne Manzi Makolo, yavuze ko iki gihembo ari icy’abakozi b’iyi sosiyete, ashimangira ko ubwitange bwabo, ubunyamwuga no kwita ku bakiliya ari byo bituma serivisi za RwandAir zigera ku rwego rwifuzwa.
Ati: “Iki gihembo ni icy’abakozi bacu, ubwitange bwabo, ubunyamwuga no kwita ku bakiliya bituma isezerano rya RwandAir ryo gutanga serivisi nziza rigerwaho buri munsi.”
RwandAir ifite abakozi barenga 2.300, ndetse ubuyobozi bwayo buvuga ko ikomeje gushora imbaraga mu kubongerera ubumenyi no guteza imbere abakozi bashya, binyuze muri gahunda zirimo RISE Graduate Development Programme na RwandAir Cadet Pilot Programme.
Skytrax yatangaje ko ibihembo bya World Airline Awards bishingira ku bushakashatsi bukorwa ku bakoresha serivisi z’indege ku isi. Ubushakashatsi bwa 2026 bwakozwe kuva muri Nzeri 2025 kugeza muri Kanama 2026, bwitabirwa n’abagenzi bo mu bihugu birenga 100 kandi bugizwe n’ibisubizo birebana n’indege zirenga 300.
Iki ni ikindi gihembo gikomeye RwandAir yegukanye muri uru rwego. Mu 2025, iyi sosiyete yari yarahawe igihembo cya Best Regional Airline in Africa, mu gihe mu 2022 yegukanye ibihembo birimo Best Airline Staff in Africa, Best Cabin Crew in Africa na Best Airline Cabin Cleanliness in Africa.
Ku rwego rwa Afurika muri rusange, Ethiopian Airlines ni yo yahawe igihembo cya Best Airline in Africa 2026, mu gihe RwandAir yaje ku mwanya wa gatanu ku rutonde rw’indege nziza muri Afurika.
