Ikipe y’Igihugu y’u Rwanda ya handball y’ingimbi zitarengeje imyaka 18 yatsinzwe n’iya Cameroon ibitego 35-21 mu guhatania umwanya wa 5-8 mu Gikombe cya Afurika kiri kubera i Abidjan muri Côte d’Ivoire.
Nyuma yo gusezererwa muri 1/4 itsinzwe na Guinea ibitego 25-22, kuri uyu wa Mbere tariki 21 Nzeri 2026 nibwo ikipe y’u Rwanda yasubiye mu kibuga ikina na Cameroon mu guhatanira imyanya.
Uyu mukino ntabwo wagendekeye neza u Rwanda kuko rwatsinzwe ibitego 35-21 nyuma y’uko igice cya mbere cyari cyarangiye Cameroon iyoboye umukino n’ibitego 13-12.
Andi makipe yasezerewe muri 1/4 yakiniraga umwanya wa 5-8 ni Nigeria na Côte d’Ivoire iri mu rugo.
Uyu mukino warangiye Nigeria itsinze ibitego 31-26, bivuze ko ariyo igomba gukina na Cameroon zihatanira umwanya wa 5-6, mu gihe u Rwanda ruzakina na Côte d’Ivoire mu guhatanira umwanya wa 7-8.
Gutsindwa ku Rwanda bivuze ko rutakibonye itike y’Igikombe cy’Isi kizaba umwanya utaha, kuko amakipe 5 ya mbere ariyo azabona itike.
Irushanwa rirakomeje, Misiri yageze ku mukino wa nyuma itsinze Maroc ibitego 44-12, izahura n’ikipe itsinda hagati ya Tunisia na Guinea.
