Repubulika y’u Rwanda n’Ubwami bw’u Bubiligi byafashe umwanzuro wo gusubukura umubano wa dipolomasi, nyuma y’amezi yari amaze arangwa n’ibitandukanyije ibihugu byombi.
Uyu mwanzuro wafashwe kuri uyu wa 22 Nzeri 2026, nk’uko byatangajwe mu itangazo rihuriweho na Minisitiri w’Ububanyi n’Amahanga n’Ubutwererane w’u Rwanda, Olivier J.P. Nduhungirehe, na Minisitiri w’Intebe Wungirije akaba na Minisitiri w’Ububanyi n’Amahanga, Ibibazo by’u Burayi n’Ubutwererane mu Iterambere w’u Bubiligi, Maxime Prévot.
Ibihugu byombi byatangaje ko, mu rwego rwo gusubukura uyu mubano, ambasade zabyo zizongera gufungurwa mu gihe cya vuba.
Itangazo rigira riti “Ku ikubitiro, ambasade zombi zizayoborwa n’abahagarariye ibihugu by’agateganyo, (chargé d’affaires ad interim) bafashijwe n’umudiplomate cyangwa umukozi ushinzwe serivisi za konsula ndetse n’itsinda rito ry’abakozi ba tekiniki.”
Nyuma y’icyo cyiciro, ibihugu byombi bizatanga ubusabe bwo kwemererwa Ambasaderi (agrément), mu rwego rwo gutegura ishyirwaho ry’abahagarariye ibihugu ku rwego rw’Ambasade.
Muri iyo gahunda, byemeranyijwe ko Ambasaderi w’u Rwanda mu Bubiligi azanahagararira u Rwanda mu Muryango w’Ubumwe bw’u Burayi (EU).
U Rwanda n’u Bubiligi byavuze ko uyu mwanzuro ukurikira inama n’ibiganiro byahuje ba Minisitiri b’Ububanyi n’Amahanga b’ibihugu byombi mu mezi ashize.
Muri ibyo biganiro, impande zombi zaganiriye ku bintu zitumvikanagaho n’ibyagiye bikoma mu nkokora umubano w’ibihugu byombi, bikaba byarakemuwe.
Ibihugu byombi byashimiye by’umwihariko Leta ya Qatar, kubera uruhare yagize mu korohereza inama ya mbere yahuje ba Minisitiri bombi yabereye i Doha muri Kamena 2025.
U Rwanda n’u Bubiligi kandi byongeye gushimangira ko byiyemeje gukomeza ibiganiro bifunguye, bitaziguye kandi bisobanutse, kuko bibona ko ari ingenzi mu gukemura ibigonganisha ibihugu byombi, ndetse no kuganira ku myumvire itandukanye n’ibibazo bitarakemuka ku bibazo mpuzamahanga.
Mu rwego rwo kubaka umubano mushya, ibihugu byombi byemeranyije kandi ku mahame azayobora imibanire yabyo mu gihe kiri imbere, arimo kutivanga mu bibazo by’undi, kubahana no gukorana mu buryo bwubaka.
Aya mahame azashingirwaho mu guteza imbere no gukomeza umubano wa dipolomasi hagati y’u Rwanda n’u Bubiligi.
Ku wa 17 Werurwe 2025 ni bwo u Rwanda rwari rwafashe umwanzuro wo guhagarika umubano warwo mu bya dipolomasi n’u Bubiligi, runategeka Abadipolomate b’iki gihugu kuba bavuye ku butaka bwarwo mu gihe kitarenze amasaha 48.
