Ikipe ya RSSB Tigers yo mu Rwanda ihagarariye umugabane w’Afurika mu Irushanwa rihuza amakipe yatwaye ibikombe ku migabane yayo, FIBA Intercontinental, yiyongereye amahirwe yo kugera muri 1/2 nyuma yo kubona intsinzi yayo ya mbere itsinze Shanghai Sharks yo mu Bushinwa amanota 117-115.
Iyi ntsinzi yabonetse mu masegonda ya nyuma y’iminota y’inyongera (Over Time) kuko umukino wari warangiye amakipe yombi anganya, bisabye amanota abiri (2) ya free throws (Lancer franc) yatsinzwe na kapiteni wa RSSB Tigers Antino Jackson Jr.
Kuri uyu wa Gatatu tariki 23 Nzeri 2026, RSSB Tigers yamanutse mu kibuga ikina umukino wayo wa kabiri ari nawo wari uwa nyuma wo mu itsinda A na Shanghai Sharks muri FIBA Intercontinental Cup 2026 iri kubera i Beijing mu Bushinwa.
RSSB Tigers yagiye gukina uyu mukino idafite abakinnyi bose yajyanye kuko Johnny Hamilton ukina kuri 5 (Center) yivanye mu bandi nyuma y’umukino wa mbere ku mpamvu ze bwite nyuma y’uko atagaragaye no mu mukino wa mbere ndetse na Nisre Zouzoua wagize ikibazo cy’imvune mu mukino wa Rytas Vilnius.
Mu gace ka mbere ikipe ya Shanghai Sharks yatangiye neza itsinda amanota 30-17, ndetse no mu gace ka kabiri itsinda amanota 30-29, bituma amakipe ajya kuruhuka iri imbere n’amanota 60-46.
Mu gice cya kabiri nibwo RSSB Tigers yatangiye kugaruka mu mukino, ibyayigoraga birimo gutsinda amanota 3 mu gice cya mbere noneho bitangira kuyikundira.
Agace ka gatatu karangiye amakipe yombi anganyije amanota 25-25, ariko mu gace ka kane RSSB Tigers itsinda amanota 32-18 bituma iminota isanzwe y’umukino irangira amakipe yombi aguye miswi y’amanota 103-103.
Nk’uko amategeko abiteganya, hahise hiyambazwa iminota 5 y’inyongera (Overt Time) kugira ngo amakipe yisobanure.
Muri iyi minota n’ubundi, amakipe yombi yakomeje kunganya kugeza mu masegonda 3 ya nyuma ubwo kapiteni wa RSSB Tigers Antino Jackson Jr. yari agiye gutsinda amanota 3 ariko bahita bamukorera ikosa, ahabwa free throws eshatu (3) zo kurihana.
Antino yateye iya mbere arayihusha, ariko ahita atsinda izindi ebyiri biha RSSB Tigers kujya imbere n’amanota 117-115 ndetse umukino uhita urangira utyo.
Uyu ni umukino wa mbere RSSB Tigers yari itsinze muri FIBA Intercontinental Cup nyuma y’uko yari yatsinzwe na Rytas Vilnius yo muri Lithuania ihagarariye umugabane w’u Burayi amanota 107-89.
Shema Osborn wa RSSB Tigers yabaye umukinnyi mwiza w’uyu mukino nyuma yo gutsinda amanota 16, akora rebounds 5, yambura umupira inshuro 2.
Abandi bakinnyi ba RSSB Tigers bitwaye neza barimo Leonard Craig Randall II watsinze amanota 30, Ntore Habimana watsinze 15, Antino Jackson Jr. watsinze 12 na Teafale Marquise Lenard Jr. watsinze 12.
Brandon Goodwin wa Shanghai Sharks yari yagoye cyane RSSB Tigers kuko yayitsinze amanota 32, atanga imipira 4 yavuyemo amanota, yambura umupira inshuro 2 ndetse akora na rebounds 2.
Kugeza ubu, RSSB Tigers iyoboye itsinda A n’amanota 3 nyuma yo kurangiza imikino y’amatsinda, Rytas Vilnius ni iya kabiri n’amanota 2, naho Shanghai Sharks ifite inota rimwe.
Kuri uyu wa Kane tariki 24 Nzeri 2026, nibwo imikino yo mu itsinda A ikomeza, Rytas Vilnius ikina na Shanghai Sharks, saa tatu n’igice za mu gitondo ku isaha y’i Kigali (09h30).
Uretse iri tsinda A, hari n’imikino yo mu itsinda B nayo iri gukinwa.
Umukino wa mbere wo muri iri tsinda warangiye Beijing Royal Fighters yo mu Bushinwa yakiriye iyi mikino itsinzwe na Club Atletico Boca Juniors yo muri Argentine ihagarariye Amerika y’Amajyepfo amanota 88-78.
Imikino yo muri iri tsinda irakomeza kuri uyu wa Gatatu, Beijing Royal Fighters ikina na NBA G League United yo muri Leta Zunze Ubumwe z’Amerika saa 13:30 ku isaha y’i Kigali.
Amakipe abiri ya mbere muri buri tsinda azahita abona itike yo gukina 1/2 cy’irangiza,yishakamo izijya ku mukino wa nyuma n’itwara igikombe.
Ni mu gihe ikipe zitazabasha kuzamuka zizahura hagati yazo zihatanira umwanya wa 5-6.
