Minisitiri wa Siporo w’u Rwanda, Nelly Mukazayire yashimiye ikipe ya RSSB Tigers yitwaye neza ikabona intsinzi yayo ya mbere mu irushanwa rihuza amakipe yatwaye ibikombe ku migabane yayo, FIBA Intercontinental Cup 2026, igatsinda Shanghai Sharks yo mu Bushinwa amanota 117-115.
Abinjuje ku rubuga rwa X, Minisitiri Mukazayire yagize ati,”Congratulations, RSSB Tigers! Komereza muri uwo mujyo. Komeza ushikame, uhangane, kand ntudohoke n’utera n’indi ntambwe. Twese tukuri inyuma.”
Yasoje agira ati ”Nuko nuko RSSB Tigers! Mukomereze aho tubifurije intsinzi no ku cyiciro gikurikira. Turabashimiye.”
RSSB Tigers yitabiriye FIBA Intercontinental Cup 2026 i Beijing mu Bushinwa nk’ikipe ihagarariye umugabane wa Afurika nyuma yo kwegukana igikombe cya Basketball Africa League cy’uyu mwaka.
RSSB Tigers yatangiye FIBA Intercontinental Cup itsindwa na Rytas Vilnius yo muri Lithuania ihagarariye u Burayi, ariko mu mukino wayo wa kabiri ari nawo wa nyuma wo mu itsinda irimo rya mbere yabashije gutsinda Shanghai Sharks kuri uyu wa Gatatu tariki 23 Nzeri 2026.
Amakipe abiri ya mbere muri iri tsinda niyo azakomeza muri 1/2, bivuze ko RSSB Tigers igomba gutegereza uko umukino wa Rytas Vilnius na Shanghai Sharks uzarangira kugira ngo hamenyekane amakipe ya mbere muri iri tsinda.
Uyu mukino utegerejwe kuri uyu wa Kane saa tatu n’igice za mu gitondo (09h30) ku isaha y’i Kigali.
