Ikipe y’Igihugu y’u Rwanda y’umupira w’amaguru y’abagore ‘She-Amavubi’ yatangiye umwiherero kuri iki Cyumweru tariki 27 Nzeri 2026 yitegura imikino yo gushaka itike ya Olempike ya 2028, CAF Women’s Olympic Qualifying Tournament.
She-Amavubi igiye gukorera umwiherero muri Hotel Sainte Famille iherereye mu Mujyi wa Kigali, mu Karere ka Nyarugenge.
Mu ijonjora rya kabiri, ikipe ya She-Amavubi izatangira yakira Ethiopia tariki 7 Ukwakira 2026 muri Kigali Pele Stadium, umukino uzatangira saa kumi n’ebyiri z’umugoroba (18h00) naho umukino wo kwishyura uzabera muri Ethiopia tariki 13 Ukwakira 2026.
Ikipe izakomeza hagati y’izi zombi, izahura n’izaba yakomeje hagati ya Botswana na Tanzania.
Ku rutonde rw’agateganyo, umutoza wa She-Amavubi, Cassa Mbungo André yahamagaye abakinnyi 29 bose basanzwe bakina mu Rwanda uretse Mukagatete Emeline ukina muri Espagne na Usanase Zawadi ukina muri Turukiya.
Mu gitondo cyo kuri uyu wa mbere nibwo Mukagatete Emeline ukinira Féminas Fuensalida yageze mu Rwanda, ndetse ahita asanga bagenzi be mu mwiherero.
Uko irushanwa riteye
Mu banyamuryango 54 b’Impuzamashyirahamwe y’Umupira w’Amaguru muri Afurika, CAF, hiyandikishije amakipe 35.
Amakipe atandatu (6) ari inyuma ku rutonde rw’Impuzamashyirahamwe y’Umupira w’Amaguru ku Isi, FIFA, niyo yakinnye ijonjora rya mbere gusa, ryasize amakipe 3 ariyo akomeje.
Aya makipe 3 yavuye mu ijonjora ry’ibanze yasanze andi 29 yari asigaye, ahita aba 32 yerekeza mu ijonjora rya kabiri ari n’aho u Rwanda ruzahera rukina na Ethiopia.
Aya makipe 32 nayo yagabanyijwe mu nzira ebyiri zitandukanye z’amakipe 16 muri buri nzira.
Amakipe azaba aya mbere muri buri nzira niyo azabona itike yo kuzakina imikino Olempike izabera i Los Angeles muri Leta Zunze Ubumwe z’Amerika kuva tariki 10 kugeza tariki 29 Nyakanga 2028.
Uretse iyi mikino y’ijonjora rya kabiri itegerejwe mu ntangiriro z’ukwezi kwa 10, iy’irya gatatu izakinwa hagati ya tariki 23 Gashyantare na 6 Werurwe 2027, iy’irya kane ikinwe hagati ya tariki 4 na 12 Ukwakira 2027 naho iy’irya gatanu ikinwe hagati ya tariki 23 Ugushyingo na 4 Ukuboza 2027.
