Umunya-Sénégal Cheikh Sarr yongeye kugaruka gutoza mu Rwanda, aho yagizwe Umutoza Mukuru wa REG WBBC, ikipe yitegura guhatanira igikombe cya Africa Women’s Basketball League (AWBL) 2026.
Sarr yahawe izi nshingano mu gihe REG WBBC ikomeje imyiteguro yo guhagararira u Rwanda muri iri rushanwa rihuza amakipe y’abagore akomeye muri Afurika.
Uyu mutoza azayifasha REG WBBC mu mwaka w’imikino wa 2026/2027 no mu marushanwa mpuzamahanga.
Cheikh Sarr asanzwe amenyereye Basketball yo mu Rwanda, kuko hagati ya 2021 na 2025 yatoje amakipe y’Igihugu y’abagabo n’abagore. Uburambe afite mu mikino yo mu Rwanda no ku rwego mpuzamahanga ni bumwe mu bushobozi REG WBBC izaba imwitezeho mu marushanwa ayitegereje.
Iyi kipe yatangaje ko yiteguye kuzahagararira u Rwanda neza mu mikino ya AWBL ndetse Cheick Sarr azayifasha binyuze mu bunararibonye n’amayeri azifashisha mu mikino.
Imikino y’ijonjora rya AWBL 2026 iteganyijwe kuva ku wa 11 kugeza ku wa 20 Ukuboza 2026.
REG WBBC iheruka kwegukana Shampiyona y’u Rwanda ya Basketball mu bagore inshuro eshatu zikurikiranya, iyobowe na Mukaneza Esperance wari umutoza wayo mbere y’izi mpinduka. Iyi kipe igiye muri AWBL ifite intego yo kwitwara neza no guhagararira u Rwanda ku rwego rwa Afurika.
