Urukiko rwa Old Bailey mu Bwongereza rwemeje ko urubanza rwa Dr. Vincent Bajinya, ukekwaho ibyaha bifitanye isano na Jenoside yakorewe Abatutsi mu 1994, ruzatangira ku wa 4 Ukwakira 2027.
Dr. Bajinya w’imyaka 65, ufungiwe muri Gereza ya Belmarsh, yitabiriye inama ntegurarubanza yo ku wa 9 Ukwakira 2026 mu buryo bw’ikoranabuhanga. Biteganyijwe ko urubanza ruzamara ibyumweru umunani kugeza kuri 12, nubwo itariki yatanzwe ari iy’agateganyo.
Dr. Bajinya ashinjwa kugira uruhare muri Jenoside n’ibindi byaha bitandatu by’ubwicanyi harimo ibyaha byibasiye inyokomuntu. Ubushinjacyaha buvuga ko yayoboye cyangwa yashishikarije Interahamwe kwica Abatutsi i Kigali hagati ya tariki ya 6 n’iya 13 Mata 1994. Gusa yahakanye ibyaha aregwa byose.
Urundi rubanza rw’inama ntegurarubanza ruzaba ku wa 15 Mutarama 2027, aho azamenyeshwa uburyo aziregura.
Ni ubwa mbere mu Bwongereza hagiye kuburanishwa umuntu ukekwaho kugira uruhare muri Jenoside yakorewe Abatutsi mu 1994.
Iperereza kuri dosiye ye ryamaze imyaka irindwi, ritangizwa n’ubusabe bw’u Rwanda bwo mu 2019. Polisi y’u Bwongereza yatangaje ko abandi bantu batandatu bagikurikiranweho ibyaha bifitanye isano na Jenoside, barimo babiri bamaze gufatwa.
