Abatoza ba Rayon Sports y’Abagore barimo Umukuru Rwaka Claude, Umwungiriza we, Rudasingwa Florian ‘Freury’ na Dushimimana Djamila ushinzwe Ubuzima bw’ikipe, basezeye ku nshingano zabo nyuma yo kumara amezi atatu badahembwa.
Aba batoza bishyuza Rayon Sports amafaranga arimo imishahara y’amezi atatu n’uduhimbazamusyi tw’imikino batsinze.
Rayon Sports WFC iheruka gutsinda Ndabuc WFC ibitego 9-0 mu mukino w’Igikombe cy’Amahoro cya 2025. Ni ibitego byatsinzwe n’Umunya-Kenya Karambu Monica, winjije bitatu, Niyonshuti Emerance [2] mu gihe ibindi byinjijwe na Rachael Muema Otolo, Mary Chavinda Gibi, Umuhoza Angélique na Uwanyirigira Sifa.
Ubusanzwe Rwaka Claude ahembwa miliyoni 1 Frw ku kwezi, mu gihe umukino ikipe yatsinze ahabwa ibihumbi 100 Frw.
Umunota wamenye ko yishyuzaga miliyoni 3 Frw z’imishahara ndetse n’ibihumbi 300 Frw by’imikino itatu ikipe yatsinze.
Icyasembuye icyemezo cye cyo kwandika asezera ikipe ni uko muri Gashyantare 2025 yanditse asaba ubuyobozi kumuguriza ibihumbi 400 Frw ariko ategereza gusubizwa araheba.
Abatoza ba Rayon Sports WFC bafashe icyemezo cyo gusezera mu gihe iyi kipe yitegura umukino wa Shampiyona uzayihuza na AS Kigali WFC, ku wa Gatandatu, tariki ya 8 Werurwe 2025.
