Abanyeshuri bagize Icyiciro cya Mbere n’abarimu bo muri Kaminuza ya Gisirikare y’u Rwanda (National Defence College-R), batangiye urugendo shuri mu gihugu rugamije kubahuza n’abafata ibyemezo kuri politiki z’igihugu, no kubafasha gusobanukirwa mu buryo bufatika ibyihutirwa mu iterambere ry’u Rwanda.
Ni urugendo rwatangiye ku wa Mbere tariki 16 Ugushyingo 2026, rugamije gusobanurira aba banyeshuri n’abarimu, ishyirwa mu bikorwa rya gahunda y’Icyerekezo cya 2050, na Gahunda y’Imbaturabukungu y’Icyiciro cya Kabiri (NST2).
Uru rugendo rwatangiye hasurwa Minisiteri y’Ingabo, Minisiteri y’Ubutegetsi bw’Igihugu na Minisiteri y’Ubucuruzi n’Inganda.
Umuyobozi Mukuru ushinzwe amasomo, Prof. Patrick Osei Kifuor, yavuze ko iki gikorwa giha abanyeshuri amahirwe yo kurushaho gusobanukirwa uburyo politiki z’igihugu zitegurwa n’uko zishyirwa mu bikorwa n’uruhare bigira mu iterambere ry’igihugu.
Uru rugendo shuri ruzakomereza mu ntara no mu turere dutandukanye, aho abanyeshuri bazasura ibikorwa bitandukanye kugira ngo barebe uko politiki z’iterambere ry’igihugu zihindurwamo ibikorwa bifatika kandi bigashyirwa mu bikorwa hasi mu baturage.












