Ikipe y’Igihugu y’u Rwanda y’abatarengeje imyaka 18 mu bangavu, yatsinzwe n’iya Misiri amanota 80-39 mu mukino wa gatatu w’imikino y’akarere ka gatanu yo gushaka itike y’Igikombe cya Afurika cy’abatarengeje imyaka 18 iri kubera i Cairo mu Misiri.
Kuri iki Cyumweru tariki 26 Nyakanga 2026 nibwo ikipe y’igihugu y’u Rwanda y’umutoza Munyaneza Joseline yakinnye umukino wayo wa gatatu ari nawo wa nyuma w’amatsinda n’ikipe y’igihugu ya Misiri yari mu rugo.
Uyu mukino ntiwigeze worohera na gato u Rwanda kuko rwawutsinzwemo amanota 80-39 n’ikipe y’igihugu ya Misiri.
Atete Laissa Ndaruhutse w’u Rwanda yari yagerageje kwitwara neza muri uyu mukino atsinda amanota 20, akora rebounds 2, yambura umupira (Steals) inshuro 8, akora ibihomo (blocks) 3.
Ku rutonde, Misiri yarangiye iyoboye n’amanota 6 nyuma yo gutsinda imikino 3 yose yakinnye, naho u Rwanda ruza ku mwanya wa kabiri n’amanota 4 nyuma yo gutsinda umukino umwe, rugatsindwa imikino 2.
Kenya ya gatatu nayo inganya imibare n’u Rwanda, ndetse ikanayinganya na Tanzania ya kane.
Nyuma y’iyi mikino harakurikiraho imikino ya 1/2 aho ikipe ya mbere ihura n’iya kane, naho ikipe ya kabiri igahura n’iya gatatu.
Ibi bivuze ko u Rwanda ruzakina na Kenya muri 1/2, naho Misiri igahura na Tanzania, iyi mikino yombi izakinwa ku wa Kabiri tariki 28 Nyakanga 2026.
Amakipe 4 niyo yitabiriye iyi mikino, hanyuma yarazengurukanye hagati yayo mbere yo kwerekeza mu mikino yo gukuranwamo.
Uretse abangavu, n’ikipe y’ingimbi nayo iri mu Misiri aho nabo bari gukina imikino yo gushaka itike y’Igikombe cya Afurika.
Amakipe 6 niyo yitabiriye mu ngimbi, agabanywa mu matsinda abiri aho u Rwanda rwisanze hamwe na Tanzia na Misiri.
Kuri uyu wa Gatandatu tariki 25 Nyakanga 2026 nibwo u Rwanda rwakinnye umukino warwo wa mbere warangiye rwitwaye neza rutsinda Tanzania amanota 86-57.
Kuri iki Cyumweru nibwo u Rwanda rukina na Misiri mu mukino warwo wa kabiri wo mu itsinda.
