Ikipe ya Patriots BBC yatsinze REG BBC amanota 84-75 naho RSSB Tigers BBC itsinda APR BBC amanota 97-82 ku munsi wa mbere wa 1/2 cy’imikino ya kamarampaka, Cheetah Energy RBL Playoffs 2026 mu bagabo.
Mu ijoro ryakeye ryo ku wa 5 Kanama 2026 nibwo muri BK Arena hatangiye imikino ya 1/2 mu mikino ya kamarampaka.
Saa moya z’ijoro hakinwe umukino wa mbere wahuje Patriots BBC yabaye iya kabiri ku rutonde rwa Shampiyona na REG BBC yabaye iya gatatu ku rutonde rwa Shampiyona.
Uyu mukino warangiye Patriots BBC y’umutoza Niyomugabo Munyandamutsa Sunny yitwaye neza itsinda REG BBC amanota 84-75 ibikesha Damaria Franklin witwaye neza muri uyu mukino agatsinda amanota 26, akora rebounds 4 ndetse atanga umupira umwe wavuyemo amanota.
Abandi bakinnyi ba Patriots BBC bitwaye neza muri uyu mukino barimo Stubbs Jeffery Tyrone watsinze amanota 17, Irakoze Herve Hodal watsinze amanota 11 na Garba Chingka Kennedy watsinze amanota.
Ku ruhande rwa REG BBC y’umutoza Odaudu Ogoh, Sangwa Armel yari yitwaye neza atsinda amanota 14, Garmine Kande Kieli atsinda amanota 11 naho Kamdoh Betoudji Frank atsinda amanota 10 n’ubwo bitari bihagije ngo itsinde uyu mukino.
Iyi kipe ya REG BBC yakinnye uyu mukino idafite abakinnyi bayo babiri William Kiah Perry na Abdoulaye Harouna Amadou iherutse gusinyisha ngo bazayifashe muri iyi mikino ya kamarampaka, nyamara ni abakinnyi bari bitezweho kuyifasha byinshi.
Umutoza Odaudu Ogoh yavuze ko aba bakinnyi batakinnye kuko batinze kugera mu Rwanda ariko ko ku mukino wa kabiri bazakina.
Ikintu cy’ingenzi Patriots BBC yarushije REG BBC ni ukuyitanga kwinjira mu mukino kuko mu gace ka mbere Patriots BBC yashyizemo ikinyuranyo cy’amanota 16, ibi byatumye REG BBC ikina ishaka uko yakwishyura ariko ntibyayikundira.
Nyuma y’uyu mukino hakurikiyeho umukino wahuje APR BBC yabaye iya mbere ku rutonde rwa Shampiyona na RSSB Tigers BBC yabaye iya kane ku rutonde rwa Shampiyona.
Uyu mukino warutegerejwe na benshi warangiye RSSB Tigers y’umutoza Henry Dennis Newton Mwinuka yitwaye neza itsinda APR BBC y’umutoza James Edwards Maye Jr amanota 97-82.
Umunyamerika Bey Tyler Tarik uherutse gusinyishwa na RSSB Tigers yabaye itandukaniro kuri uyu mukino atsinda amanota 39, akora rebounds 11 ndetse atanga imipira 3 yavuyemo amanota.
Kwitwara neza kwa Tarik byunganiwe na Zouzoua Nisre Mimi watsinze amanota 21 na Antino Alvalezes jackson watsinze amanota 12 bihesha intsinzi RSSB Tigers mu mukino wa mbere w’imikino ya 1/2 mu mikino ya kamarampaka.
Ku ruhande rwa APR BBC, Leonard Craig Randall II yari yakoze ibishoka atsinda amanota 25 na Adonis Jovon Filer atsinda amanota 14, ndetse ntawundi mukinnyi wagejeje mu manota 10 w’iyi kipe y’Ingabo z’u Rwanda
Itandukaniro kuri uyu mukino ryabaye ko ikipe ya RSSB Tigers yagumye mu mukino kuva utangiye kugeza urangiye ndetse itandukaniro mu manota ryabonetse mu duce tubiri twa nyuma tw’umukino.
Ku wa Gatanu tariki 7 Kanama 2026 nibwo hazakinwa imikino ya kabiri muri BK Arena, biteganyijwe ko umukino wa REG BBC na Patriots BBC uzatangira saa 18:30 naho umukino wa RSSB Tigers na APR BBC ukazatangira saa moya n’igice z’ijoro.
Muri iyi mikino ya 1/2 ya kamarampaka, amakipe azakina atanguranwa gutsinda imikino 3 mu mikino 5 iba iteganyijwe.
