Umuyobozi mukuru ushinzwe imikoranire y’ingabo n’abaturage, Col Désiré Migambi Mungamba, uyu munsi yifatanyije n’abakozi ba komisiyo y’igihugu yo gusezerera no gusubiza mu buzima busanzwe abari abasirikare (RDRC) ndetse n’abahoze ari abarwanyi baturutse mu kigo cya Mutobo, mu gikorwa cyo kwibuka no guha icyubahiro abazize Jenoside yakorewe Abatutsi mu 1994.
Iki gikorwa cyabereye ku Rwibutso rwa Jenoside rwa Kigali ku Gisozi.
Abakozi ba komisiyo y’igihugu ishinzwe gusezerera no gusubiza mu buzima busanzwe abahoze ari abasirikare, bari kumwe n’abahoze mu mutwe wa FDLR bagera kuri 245 bari guhabwa amasomo mu kigo cya Mutobo,kuri uyu wa Kabiri bakoze igikorwa cyo kwibuka Jenoside yakorewe Abatutsi, cyabereye ku rwibutso rwa Jenoside rwa Kigali ruherereye ku Gisozi.
Bahawe ibiganiro byabafashije gusobanukirwa uburyo Jenoside yakorewe Abatutsi yateguwe ikanashyirwa mu bikorwa n’ubuyobozi bubi bwacengezaga amacakubiri mu Banyarwanda.
Mu ijambo rye, Col Migambi yashimangiye ko urubyiruko rukwiye gukomeza kurangwa n’indangagaciro zaranze igihugu zirimo ubumwe, gukunda igihugu, ubusugire bwacyo n’iterambere.
Abenshi muri aba bahoze muri FDLR ni urubyiruko rwavukiye kandi rugakurira mu mashyamba ya Congo.
Iki gikorwa cyateguwe mu rwego rwo kubafasha gusobanukirwa amateka ya Jenoside yakorewe Abatutsi no gukangurirwa kurwanya ingengabitekerezo yayo.
